Kóleńkeli ekonomıkadan bıýdjetke 4 trln teńge salyq túspeı jatyr – Natalıa Godýnova

ASTANA. QazAqparat – Búgin Senattyń jalpy otyrysynda Joǵary aýdıtorlyq palatanyń tóraǵasy Natalıa Godýnova tıimsiz salyq jeńildikterin alyp tastaýdy usyndy, dep habarlaıdy QazAqparat tilshisi.

«Salyq bazasyn keńeıtý úshin barlyq rezervti paıdalaný qajet. Kóleńkeli ekonomıka saldarynan memleket bıýdjetine jyl saıyn keminde 3-4 trln teńge salyq túspeıdi jáne bul esep-qısap kóleńkeli ekonomıka týraly resmı derekterde jarııalanǵan. Degenmen bul kórsetkish budan da joǵary degen pikir bar», - dedi Natalıa Godýnova.

Onyń aıtýynsha, taǵy bir rezerv tıimsiz qoldaý sharalary men salyq jeńildikterin qysqartýǵa qatysty.

«Tek salyq jeńildikteri boıynsha tórt jylda bıýdjet kirisinen qaǵylǵan qarajat 30 trln teńgeni qurady. Onyń ishinde Ulttyq ekonomıka mınıstrligi de, Memlekettik kirister komıteti de eskermegen 64 salyq jeńildigi bar. Osy jeńildikter qandaı áser bergenin eshqaısysy anyq aıtpady. Bul jeńildikterdiń kóbisi jalpy álemdik tájirıbede eskerilgenin bilemin, biraq biz olardyń tıimdiligin baǵalamaı kelemiz. Olardyń keıbireýiniń tıimsiz ekenin eskerip, tizimnen alyp tastaǵan jón bolar», - dedi N. Godýnova.