Kóleńkeli sý naryǵy: Qazsýshar Jambyl fılıalynyń bastyǵy jumystan qýyldy
ASTANA. KAZINFORM — Іshki aýdıt qorytyndysyna saı Jambyl oblysy boıynsha Qazsýshar fılıalynyń dırektory men Asa óndiristik aımaǵynyń basshysy qyzmetinen bosatyldy.
Budan bólek, fılıal dırektorynyń orynbasary men Qordaı, Baızaq, Merki óndiristik aımaqtarynyń basshylary qatań sógis túrinde tártiptik jaýapkershilikke tartyldy.
Eske salsaq, osyǵan deıin Sý resýrstary jáne ırrıgatsııa mınıstri Nurjan Nurjigitovtiń tapsyrmasy boıynsha mınıstrliktiń ishki aýdıt departamenti Jambyl oblysy boıynsha Qazsýshar fılıalyna tekseris júrgizgen bolatyn.
Anyqtalǵan quqyq buzýshylyqtardy odan ári qaraý úshin aýdıt materıaldary QR Bas prokýratýrasyna jiberildi.
Bul jumystar sýdyń «kóleńkeli» naryǵymen, sý salasyndaǵy zańsyz árekettermen kúresý jáne tártip pen ashyqtyqty qamtamasyz etý úshin júzege asyp jatyr.
Aıta ketý kerek, mekemeniń ózge aımaqtardaǵy fılıaldarynda da tekseris júrgiziledi.
Mınıstrlik mamandary Jambyl oblysynda júrgizgen aýdıt barysynda sý resýrstaryn zańsyz paıdalanýdyń 10-ǵa jýyq faktisin, sondaı-aq sharýalarmen sýarmaly sý berý kelisimsharttaryn jasaý barysynda zańbuzýshylyqtarǵa jol bergenin anyqtaǵan bolatyn.
«Sý resýrstaryn zańsyz paıdalaný faktilerimen kúres jalǵasady. Ol úshin meniń tapsyrmam boıynsha mınıstrlik janynan arnaıy komıssııa qurylyp, Qazsýshar fılıaldary men basseındik ınspektsııalarǵa tekseris júrgizedi. Zańsyz áreketterge mindetti túrde tosqaýyl qoıylyp, quqyq buzýshylar men laýazymdy qyzmetkerler jaýapkershilikke tartylady. Biz sý resýrstaryn paıdalanýdy baqylaýdy kúsheıtemiz», — dedi Sý resýrstary jáne ırrıgatsııa mınıstrliginiń apparat keńesinde vedomstvo basshysy Nurjan Nurjigitov.
