Kóleńkeli ekonomıkamen kúres: Elde derekterdi taldaýdyń tsıfrlyq platformasy qurylady
ASTANA. KAZINFORM — Úkimette vıtse-premer — ulttyq ekonomıka mınıstri Serik Jumanǵarınniń tóraǵalyǵymen «kóleńkeli» ekonomıkaǵa qarsy is-qımyl máselesi boıynsha jıyn ótti, dep habarlaıdy QR Premer-mınıstriniń baspasóz qyzmeti.
«Kóleńke» deńgeıin azaıtý boıynsha júıeli kúres sheńberinde ótken jyly jańa tásilder engizildi. Memlekettik organdardyń damý josparlaryna tıisti KPI bekitildi. Kóleńkede qalý qaýpi zor saýda, qurylys, kólik, densaýlyq saqtaý, bilim berý, aýyl sharýashylyǵy sekildi sektorlarda salalyq jol kartalary ázirlenip, júzege asyrylyp jatyr.
Qarjy vıtse-mınıstri Erjan Birjanov atap ótkendeı, salalyq jol kartalaryn júzege asyrý aldyn alý sharalarynyń tıimdi bolýyna múmkindik berdi. Aınalymdardy zańdastyrý boıynsha belgili bir nátıjege qol jetkizildi. Mysaly, ishki saýdada kóleńkeli aınalym deńgeıi 3,54%-dan 2,97%-ǵa deıin, bilim berýde 1,52%-dan 1,1%-ǵa deıin, aýyl sharýashylyǵynda 1,88%-dan 1,73%-ǵa deıin tómendedi. 2024 jyldyń qorytyndysyna qaraıtyn bolsaq, JІÓ-degi kóleńkeli ekonomıkanyń úlesi 16,71%-ǵa qysqardy. 2025 jyldyń qorytyndysy osy jyldyń tamyz aıynda shyǵarylady.
— Tsıfrlandyrýdyń qarqyndy damýy jáne tsıfrlyq arnalardy paıdalaný arqyly jańa kóleńkeli shemalardyń paıda bolýy shashyrańqy salalyq jol kartalarynan kóleńkeli ekonomıkaǵa qarsy is-qımyldyń biryńǵaı keshendi josparyn qalyptastyrýǵa kóshý týraly sheshimge alyp keldi. Smart Data Finance negizinde memlekettik organdardyń aqparattyq júıelerin biriktiretin jáne derekterdi taldaý men óńdeýde jasandy ıntellekt quraldaryn qoldanatyn tsıfrlyq platforma qurylady. Tsıfrlyq platforma salyq, keden, eńbek jáne salalyq júıelerdiń deregin salystyrýǵa, sur shemalardy qoldanýǵa beıim anaǵurlym osal býyndardy anyqtaýǵa, sondaı-aq olardyń ekonomıka sektorlary arasyndaǵy qozǵalysyn baqylaýǵa múmkindik beredi. Sonymen qatar JI quraldary keshendi jospardyń oryndalýyn baqylaý men nysanaly kórsetkishke qol jetkizý tıimdiligin baǵalaýda qoldanylady, — delingen habarlamada.
Keshendi jospar men tsıfrlyq platforma Úkimettiń kóleńkeli operatsııalar órisin taryltý jónindegi dáıekti jumysynyń kelesi kezeńi bolady. Kóleńkege beıim salalardy tsıfrlandyrý boıynsha aýqymdy jumys júrgizilip jatyr. Taýarlardyń ulttyq katalogy, otandyq óndirýshilerdiń tizilimi, taýarlardy tańbalaý men qadaǵalaý, tsıfrlyq teńge men tsıfrlyq QQS engizilip, EShF barlyq jerde qoldanylady.
Sur shemalardyń qoldanylýyna anaǵurlym osal salanyń biri — saýdadaǵy kóleńkeli aınalymdy azaıtýdyń qosymsha sharalary qabyldanady. Naryqtaǵy qyzmetti jańǵyrtý men retke keltirý baǵa belgileýdiń ashyqtyǵyn arttyrýǵa arnalǵan kóterme satyp alý standartyn engizý esebinen qamtamasyz etiledi.
Jıyn qorytyndysy boıynsha vıtse-premer memlekettik organdarǵa Qarjy monıtorıngi agenttigimen birlesip bir aı ishinde naqty tsıfrlyq sheshimdermen jáne usynystarmen kóleńkeli ekonomıkaǵa qarsy is-qımyldyń keshendi josparyn ázirleýdi tapsyrdy.
Budan buryn Serik Jumanǵarınniń jubaıy 2024 jyly 88 mln teńgeden astam tabys tapqanyn jazǵanbyz.