Qoldy qaltaǵa salmaý, baǵandardan alys júrý: Qutqarýshylardyń elordalyqtarǵa keńesi
NUR-SULTAN. QazAqparat – Nur-Sultan qalalyq Tótenshe jaǵdaılar departamenti ekpindi jel turyp, kóktaıǵaq bolǵan kezdegi saqtyq sharalary týraly aıtty, dep habarlaıdy QazAqparat tilshisi.
Buǵan deıin habarlaǵanymyzdaı, erteń, 5 aqpan kúni aýa raıynyń nasharlaýyna baılanysty elordada jáne ózge 7 óńirde eskertý jarııalandy. Nur-Sultanda kóktaıǵaq bolyp, jeldiń kúshi sekýndyna 15-20 metrge jetýi múmkin.
Osyǵan oraı Tótenshe jaǵdaılar departamenti elordalyqtar men qala qonaqtaryna saqtyq sharalary týraly eskertti.
Atap aıtqanda, qutqarýshylar aýa raıynyń ózgerýi týraly aqparatty jáne engizilgen shekteýlerdi jiti qadaǵalap otyrýǵa, kóshede baǵandardan, aǵashtardan, jarnamalardan, elektr jelisi júıelerinen jáne symdardan alys júrýge tyrysýǵa, úıdegi nemese páterdegi barlyq terezelerdi myqtylap jabýǵa, balkonnan syrtqa ushyp, qulaýy múmkin barlyq zattardy alyp tastaýǵa, úzilgen symdar men bos qozǵalyp turǵan zattarǵa jaqyndamaýǵa, qatty jel bolǵan jaǵdaıda jaqyn mańdaǵy ǵımaratqa kirip, jel basylǵanǵa deıin jasyrynýǵa keńes beredi.
Munan bólek, kóktaıǵaq kezinde qulaý yqtımaldyǵyn azaıtý úshin bıik óksheli aıaq kıimnen bas tartyp, tabany usaq sańylaýly materıaldan jasalǵan, taıǵanamaıtyn aıaq kıim kııý qajet. Joldyń júrý bóliginde óte saq bolyp, asyqpaý ári júgirmeý kerek. Tegis emes muz qatqan barlyq jerlerdi aınalyp ótýge tyrysqan jón. Qol múmkindiginshe bos bolýy qajet. Al egde jastaǵy adamdarǵa rezeńke ushtyǵy bar taıaq nemese ushtary bar arnaıy taıaq qoldanýǵa keńes beriledi.
«Esterińizde bolsyn: arqamen, betpen qulaý qaýipti, bastan zaqym alýyńyz múmkin. Zardap shekseńiz mindetti túrde dárigerge alǵashqy medıtsınalyq kómekke júginińiz. Tótenshe jaǵdaı týyndaǵan jaǵdaıda «112» nómirine qońyraý shalyńyz«, - dep eskertedi departamentten.
