Kólde syrǵanaǵan qyz: «Almaty Sý» qalaǵa keletin sý taza dep sendirdi

ALMATY. QazAqparat  - «Almaty Sý» MKK qalaǵa keletin aýyz sýdyń tazalyǵy barlyq standarttarǵa saı dep sendirdi. Bul týraly Almaty óńirlik kommýnıkatsııalar qyzmetinde ótken brıfıng barysynda kásiporyn basshylyǵy málimdedi, dep habarlaıdy QazAqparat tilshisi.

Jýrnalıster kásiporyn basshylyǵynan Úlken Almaty kólinde syrǵanaq tepken fıgýrıst qyzdyń áreketine túsinikteme berýdi surady.

Kommýnaldyq kásiporyn ókilderi Úlken Almaty kólin kúzetý olardyń quzyryna kirmeıtinin aıtty.

«Onda birneshe ózen bar. Biz sýdy ózennen alamyz. Úlken Almaty kóliniń ózinen almaımyz. Kóldiń ahýalyna Almaty elektr jelileri Kaskad GES qyzmet kórsetedi, paıdalaný suraqtaryna Іle Alataý parki jaýap beredi. Biz sýdyń bárin emes, bir bóligin ǵana alamyz. Odan soń sý birneshe tazartý kezeńinen ótedi. Almaty aýyz sýdy tek Úlken Almaty kólinen alady degen qate túsinik», - dedi «Almaty Sý» kásipornynyń resmı ókili  Serik Shaǵyrov.

Kásiporyn sýdyń sapasy boıynsha tikeleı jaýap beredi eken.

«Tabıǵatta saf taza sý bolmaıdy. Onda janýarlar álemi ómir súredi. Japyraq, tas túsedi. Bizde sý tolyq tazalaýdan ótedi. Eń aldymen qoqystan tazalanyp, sosyn eń sońynda zararsyzdandyrylady. Sondyqtan, qalanyń aýyz sýy ashyq bastaýlardan kelse de, barlyq talaptarǵa saı tazalanady», - dedi «Almaty Sý» kásipornynyń bas dırektorynyń orynbasary Nýrıddın Jarbolov. 

Aıta ketý kerek, Úlken Almaty kólinde mánerlep syrǵanaǵan Ksenııa Pankartovanyń vıdeosy áleýmettik jelide tarap ketti. Bul beınerolıkti 2 apta ishinde 1 mıllıon adam qaraǵan.

Áleýmettik jeli qoldanýshylarynyń kópshiligi boıjetkenniń bıi men syrǵanaý mánerine tań qalysty. Keıbireýler bul vıdeony Kanada kólderinde, Sibirdegi Baıkalda túsirilgen dep topshylaǵan. Al qoldanýshylardyń keıbiri bul vıdeony zańǵa qaıshy dep tapty.

«Úlken Almaty kóli qalanyń aýyz sý rezervýary bolyp tabylady. Bul qyz qalaısha sony taptap, ústinde júr? Shekara qyzmetkerleri, qaraýyldar qaıda? Biz endi osy sýdy ishemiz be?», -  degen ashýly pikirler qaldyrdy.

Іle Alataý parkiniń basshylyǵy boıjetkenge ruqsat bermegen.

«Negizi, Úlken Almaty kólinde túsýge tıis ruqsat etilmeıdi. Qazir biz quzyrly organdarmen bul áreketke qandaı shara qoldaný kerektigin sóılesip jatyrmyz. Týrısterge tyıym salynǵan jáne ruqsat etilgen áreketterdi túsindirý jumystaryn júrgizetin bolamyz»,- dedi Ulttyq park ókilderi.