Kólde áldeneden shoshynǵan myńdaǵan balyq sýdan shorshı sekirdi

ASTANA. QazAqparat - Ortalyq Qytaıdaǵy Tszıaotszo qalasynyń turǵyndary ózgeshe oqıǵanyń kýási boldy. Birneshe júzdegen balyq  jantalasqan kúıde kólden aspanǵa shorshı sekirgen. 

Tipti keıbireýleri jolyndaǵy qaıyqqa, jaǵalaýdy bekitken beton qabyrǵalarǵa urynǵan. Qurǵaqqa shyǵyp qalǵany qanshama. Olardyń jappaı qyrylýynyń sebep-saldary ázirge anyqtalmaı otyr.

Bul kólde budan buryn da keleńsiz jaǵdaılar bolǵan. Ekologııalyq sebepterge baılanysty balyqtardyń tirideı nemese óli kúıinde jaǵaǵa shyǵyp qalǵan oqıǵalar kezdesken. Al balyqtardyń bulaısha úreılenýi, shoshynyp aspanǵa sekirýi ózdiginen ózendi tastaýǵa umtylýy jumbaq jaıt.  Biraq bári de qorqynyshtan qashqany anyq. 

Jergilikti turǵyndardyń boljamy boıynsha, sý qoımasy aýmaǵynda kabel ashylyp, elektr toǵy soqqan bolýy múmkin.