Qoldaýshylary barda qazaq óneri ólmeıdi – Erbolat Shaldybekov

ASTANA. KAZINFORM — Birneshe kún buryn Memleket basshysy Qasym-Jomart Toqaev mádenıet salasyndaǵy bir top azamatty memlekettik nagradamen marapattaǵan edi. 

Qurmetti ataqqa ıe bolǵandardyń biri Erbolat Shaldybekov «Búgin LIVE» stýdııasyna qonaq bolyp, qazaq óneriniń qazirgi jaı-kúıin baıandady.

– Qaı salada eńbek etse de, eńbegi baǵalanyp, Prezıdentimizdiń qolynan arnaıy marapat alý qaı pendege bolsa da, úlken baqyt dep bilemin. Eń áýeli ónerdi baǵalaǵan, ónerdi qurmettegen el basqarǵan aǵa býyn ókilderine, Mádenıet mınıstrligine, Roza Baǵlanova atyndaǵy «Qazaqkontsert» memlekettik akademııalyq kontserttik uıymyna rızashylyǵymdy bildiremin. Sebebi óner men ómirdiń arasyndaǵy bizdiń oryndaýshylyǵymyzdy halyqpen qaýyshtyryp otyratyn – osyndaı kontserttik ujymdar. «Roza Baǵlanova atyndaǵy Qazaqkontsert» memlekettik akademııalyq kontserttik uıymy – kóptegen oryndaýshyny elge tanytyp, halyq arasynda osyndaı úlken mártebege jetkizgen qara shańyraq, – deıdi Qazaqstannyń eńbek sińirgen qaıratkeri.

«Halyq qazynasy» memlekettik ulttyq óner ortalyǵynyń solıs-ártisi Prezıdent qolynan marapat alǵan kezdegi áserin bólisti.

– Memleket basshysynyń qolynan arnaıy marapat alǵan kezde úlken tolqý ústinde boldym. Jasyratyny joq, kishkene kóńilim de bosady. Bul – biz úshin úlken qurmet. Memleket tarapynan qurmetke ıe bolý, Prezıdent qolynan «Qazaqstan Respýblıkasynyń eńbek sińirgen qaıratkeri» degen ataq alý – kimniń de bolsa kútip, armandap, úmit etip júrgen armany, – deıdi óner ıesi.

Qaıratker qazaq óneri qoldaýshylardyń kóptiginiń arqasynda damyp kele jatqanyn aıtady.

– Prezıdenttiń qolynan qazirgi tańdaǵy án óneriniń ardageri, professor, halyq ártisi Qaırat Baıbosynov «Eńbek Erin» aldy. «Otan» ordenimen marapattaldy. Ol, árıne, Memleket basshysynyń ónerge bergen baǵasy, ónerdi, mádenıetti qurmettegeni dep bilemiz. Sondyqtan ol turǵydan da rızashylyǵymyzdy aıtamyz. Sol Qaırat aǵalarymyzǵa shákirt bolyp, sońynan ilesip, Qaırat aǵamyzben birge marapat alý – men úshin úlken baqyt. Sondyqtan elimiz qoldap turǵanda bizdiń óner ólmeıtini belgili, tasy órge órleıtini belgili. Qaı óner ortalyǵy bolsa da, óziniń alǵa qoıǵan jyldyq jospary bar. Sol boıynsha ár salanyń óneri jan-jaqty damyp kele jatyr. Onymen qoımaı, bizdiń ulttyq ónerimizge kóp jerlerde kóńil bólinip, nátıjesinde sahnager oryndaýshylarymyz ár óńirde halyqpen qaýyshyp jatyr, – deıdi ol.

Stýdııa qonaǵy ónerin jan-jaqty damytamyn degen adamǵa qazirgi zamanda esh kedergi joq degen pikir bildirdi.

– Jeke basymda ulttyq ónerdi dáripteýde «áttegen-aı» degen jaǵdaıǵa jolyqpadym. Biz keıde memleket tarapynan qoldaý bolsa, anany jasasa, mynany jasasa deımiz. Biraq búgingi tańda áleýmettik jeli degen dúnıe bar. Sol arqyly ózińizdi halyqqa dáripteýge kóp múmkindik jasalǵan. Árıne, oryndy, óz sheńberimen ǵana. Sondyqtan qazirgi damyǵan zamanda qaı óner adamy bolsa da, qolynan kelgenshe ónerge atsalysyp, el ishinde ónerdiń jan-jaqty damýyna múmkindigi jetkilikti. Qazirgi óner adamdarynda esh ókinish joq dep oılaımyn, – deıdi Erbolat Shaldybekov.

Aıta keteıik, Italııada bilim alyp júrgen otandyq opera ánshisi óner adamdary halyqty mádenıetke tárbıeleıdi degen pikir bildirgen edi.

Onyń aıtýynsha, qazaq halqynyń synynan ótken opera ánshisine shetelde óner kórsetý qıyn emes.