«Qoldaý» aqparattyq júıesi jemqorlyq táýekelderiniń artýyna yqpal etedi – Antıkor ókili

NUR-SULTAN. QazAqparat – Aýyl sharýashylyǵyndaǵy sýbsıdııalaý máselesine arnalǵan «Qoldaý» aqparattyq júıesi sybaılas jemqorlyq táýekelderin boldyrmaýdyń ornyna, kerisinshe, kóbeıýine yqpal etedi. Sybaılas jemqorlyqqa qarsy is-qımyl agenttiginiń Pavlodar oblysy boıynsha departamenti basshysynyń mindetin atqarýshy Ardaq Balǵojın osyndaı pikir bildirdi, dep habarlaıdy QazAqparat tilshisi.

Aardaq Balǵojınniń aıtýynsha, departament aýyl sharýashylyǵyn sýbsıdııalaý salasyndaǵy sybaılas jemqorlyq táýekelderine keshendi taldaý júrgizip, taýar óndirýshilerimen kóshpeli kezdesýler ótkizgen. Sol kezdesýler barysynda saladaǵy kadr tapshylyǵy, «Qoldaý» aqparattyq júıesiniń jetilmegendigi týraly shaǵymdar kóp aıtylǵan.

«Aýyl sharýashylyǵy salasynda memlekettik qoldaý máseleleri boıynsha anonımdi saýalnama júrgizildi. 985 respondenttiń 400-den astamy sýbsıdııa almaıtynyn aıtyp otyr. ıAǵnı saýalnamaǵa qatysqandardyń 47%-dan astamy sýbsıdııaǵa qoly jetpeginin aıtqan», - dedi departament ókili.

Sondaı-aq, ol taldaý nátıjeleri boıynsha birqatar usynys ázirlengenin aıtty.

«Óndiristiń negizgi quraldaryna ınvestıtsııalyq salymdardy sýbsıdııalaýdy jáne ekinshi deńgeıdegi bankterdiń kredıtteri boıynsha paıyzdyq mólsherlemeni sýbsıdııalaýdy qospaǵanda, sýbsıdııalaýdyń barlyq túrlerin alyp tastaý usynyldy. Aldyn ala qorytyndylar kóktemgi-kúzgi egis jumystaryna arzandatylǵan dızel jetkizetin operatordy anyqtap, baǵa belgileıtin normatıvtik-quqyqtyq aktiniń joq ekenin kórsetti. ıAǵnı, sybaılas jemqorlyq táýekelderi bar. Ókinishke qaraı, qazir ár aımaqta operatordy tańdaý jergilikti ákimdiktiń quzyrynda. Jeńildetilgen janarmaıdyń kvotalaryn Basqarma mamany qabyldaıdy. Bul da - sybaılas jemqorlyq táýekeli.

«Qoldaý» aqparattyq júıesi sybaılas jemqorlyq táýekelderin boldyrmaýdyń ornyna, qosymsha qujattardy usyný qajettigin týyndatady. Osylaısha qyzmet kórsetýshimen tikeleı baılanys paıda bolady. Bul da - táýekel.

Aqparattyq júıeniń jetilmegendigi bir IP-mekenjaıdan bir-birine eshqandaı qatysy joq birneshe túrli sharýashylyqtarǵa ótinish beretin «kómekshiler» paıda bolýyna ákeledi. Aýyl sharýashylyǵy basqarmasynyń mamandary ózderiniń jumys kompıýterinen ETsQ paıdalana otyryp, aýyl sharýashylyǵy taýaryn óndirýshiler atynan sýbsıdııalaýǵa ótinim bergen. Keıin dál sol kompıýterden álgi ótinimderge maquldaý bergen jaǵdaılar bar», – dedi Ardaq Balǵojın.

Departament basshysynyń mindetin atqarýshy sýbsıdııa taǵaıyndaý týraly qaýlylardyń jobalaryn ýaqtyly bekitpeý jıi kezdesetinin, bul sharýalardyń sýbsıdııa alýyn qıyndatatynyn atap ótti.