Qoldanystaǵy Zań Qazaqstan Respýblıkasynyń qazirgi zamanǵy memlekettiliginiń negizin qalaýshynyń rolin tolyq kólemde aıqyndaı almaıdy

Búgin Elbasy mártebesin zań deńgeıinde bekitý týraly zań jobasyn usyný barysynda sóz sóılegen depýtat Rozaqul Halmuradov osylaı málim etti, dep habarlaıdy QazAqparat.

Óz sózinde R. Halmuradov QR Tuńǵysh Prezıdenti - Elbasy N. Nazarbaevtyń álemdik bedeline toqtala kele, Prezıdentti «búgingi zamannyń Djordj Vashıngton, Atatúrk, Gandı sııaqty tek dara tulǵalarǵa tán kóshbasshylyq, qasıetimen jarqyn kúnderge jol bastaǵan Elbasy» dep atap ótti. Onyń aıtýynsha, Qazaqstan Respýblıkasynyń Prezıdenti Nursultan Nazarbaev - Prezıdent qana emes, qazirgi zamanǵa laıyqty memleket - Qazaqstan Respýblıkasynyń negizin qalaýshy, respýblıkanyń qarqyndy ekonomıkalyq ósýine, halyqtyń ál-aýqatynyń artýyna qol jetkizgen jáne barsha órkenıetti álem moıyndaǵan tulǵa. Memleket basshysynyń salıqaly saıasatynyń arqasynda Qazaqstan Respýblıkasynyń halyqaralyq arenadaǵy bedeli óte joǵary, onyń daýsyz da aıqyn dáleli Qazaqstannyń EQYU-nyń tóraǵalyq etýi bolyp tabylady.

«Onyń ústine, álemniń barlyq kóshbasshylary Memleketimizdiń basshysynyń bedelin moıyndaıdy. Reseı Úkimetiniń basshysy Vladımır Pýtın «Nursultan Ábishuly - óz halqynyń daýsyz kóshbasshysy» dep baǵalasa, Túrkııanyń Premer-Mınıstri Nursultan Nazarbaevty «túrik áleminiń lıderi» dep atady. Bizdiń qoǵamymyzda da osy týraly kóp usynystar, pikirler aıtylyp keledi. Respýblıkamyzdyń Tuńǵysh Prezıdentin - Elbasy, Elbasymyz dep maqtanyshpen ataımyz. Degenmen Elbasy mártebesi zań deńgeıinde bekitilmegen. Qoldanystaǵy «Qazaqstan Respýblıkasynyń Tuńǵysh Prezıdenti týraly» Konstıtýtsııalyq Zań Qazaqstan Respýblıkasynyń qazirgi zamanǵy memlekettiliginiń negizin qalaýshynyń rolin tolyq kólemde aıqyndaı almaıdy», dedi depýtat.