Qoldanystaǵy úsh kodekske jáne alty zańǵa túzetý engiziledi
ASTANA. 10 qazan. QazAqparat - Lotereıa qyzmetin zańmen retteý úshin qoldanystaǵy úsh kodekske jáne alty zańǵa túzetý engiziledi. Atap aıtqanda, Ákimshilik quqyq buzýshylyq týraly, Bıýdjet jáne Azamattyq (Erekshe bólim) kodeksterge, sondaı-aq «Kásiptik odaqtar týraly», «Qoǵamdyq birlestikter týraly», «Almaty qalasynyń erekshe mártebesi týraly», «Pochta týraly», «Lıtsenzııalaý týraly» jáne «Qazaqstan Respýblıkasyndaǵy memlekettik baqylaý jáne qadaǵalaý týraly» zańdarǵa birqatar ózgerister men tolyqtyrýlar engizilmek.
«Qazaqstan Respýblıkasynyń keıbir zańnamalyq aktilerine lotereıalar jáne lotereıa qyzmeti máseleleri boıynsha ózgerister men tolyqtyrýlar engizý týraly» zań jobasy Úkimettiń zań jobalaý jumystarynyń 2013 jylǵa arnalǵan josparyna sáıkes ázirlengen. Bul zań jobasy jýyrda Májiliske kelip tústi.
Jobany ázirleýshilerdiń aıtýynsha, zań jobasyn qabyldaý Qazaqstan Respýblıkasynda lotereıa qyzmetin zańnamalyq retteýge, atalǵan naryqtyń tıimdi qyzmet etýine múmkindik jasaıdy.
Lotereıa qyzmetiniń damýy shaǵyn jáne orta kásipkerlik sektorynyń odan ári damýyna oń yqpal etedi, ol jalpy elimizdiń ekonomıkasyna qolaıly áser etetin bolady. Sonymen qatar áleýmettik aýdarymdar engizý kásipkerlerdiń memleket pen azamattardyń aldyndaǵy jaýapkershiligin arttyrady. Óz kezeginde áleýmettik salanyń belgili bir býyny qarjylandyrýdyń qosymsha kózimen qamtamasyz etiletin bolady.
Zań jobasy lotereıa qyzmetin tıimdi memlekettik retteýdi qamtamasyz etýge, osy qyzmet túrine memlekettik organnyń quzyretin bekitýge, jeke sýbektiler qyzmetin júzege asyrýy úshin quqyqtyq negizderdi belgileýge, olardyń memlekettik organdarmen naqty ózara is-áreketterin jáne lotereıa qyzmetin basqarý salasynda memlekettik saıasatty júrgizýdi qamtamasyz etýde olardyń jaýapkershiligin anyqtaýǵa baǵyttalǵan.
Osy zań jobasyn qabyldaý memlekettik shyǵystardyń kóbeıýine nemese memlekettik kiristerdiń azaıýyna ákelip soqpaıdy, sonymen qatar teris áleýmettik-ekonomıkalyq jáne quqyqtyq saldary bolmaıtyny atap kórsetilgen.
