Qoldanystaǵy ekonomıkalyq júıeni qaıta qurylymdaý qajet - Ásel Áben

ALMATY. QazAqparat- «Jańa Qazaqstan» tujyrymdamasyn ázirdeý úshin naqty sharalar qoldaný kerek. Mundaı pikirdi QR Prezıdenti janyndaǵy Qazaqstan strategııalyq zertteýler ınstıtýty Almaty qalasy ókildiginiń basshysy, ekonomıka ǵylymdarynyń PhD doktory Ásel Áben aıtty, dep habarlaıdy QazAqparat tilshisi.

Onyń aıtýynsha, Jańa Qazaqstan – elimizdiń damýynyń jańa vektory. Onyń túsinigi men kontýry endi ǵana qalyptasyp, syzylyp jatyr, óıtkeni qańtar oqıǵasynan keıin eski úlgi buzyldy, biraq jańasyn salý úshin biraz ýaqyt qajet.

«Ekonomıkalyq damý turǵysynan alǵanda, naqty jaǵdaıymyzǵa, múmkindikterimizge, qolda bar resýrstarǵa, áleýetke, jahandyq úrdisterge jáne júrip jatqan geosaıası protsessterge negizdelgen qaı ekonomıkalyq model biz úshin eń ońtaıly ekenin túsinýimiz kerek. Bul rette memlekettiń halyqtyń ál-aýqatyn barynsha arttyrý jónindegi eń mańyzdy qyzmeti basty basymdyq bolyp qala beredi»,-deıdi ol.

Spıkerdiń sózinshe, utymdy jáne sonymen birge óte ıkemdi ekonomıkalyq modeldi ázirleý úshin jetekshi ekonomıkalyq ǵylymı-taldaý ortalyqtaryn tartý kerek.

«Qıyndyq, meniń oıymsha, Qazaqstan ekonomıkasynyń geosaıası protsesterge óte sezimtal ekendiginde. Іshki qurylymnyń, ishki mazmunnyń álsizdiginen negizgi ekonomıkalyq seriktesterdiń kez kelgen áreketi otandyq ekonomıkaǵa, demek, halyqtyń ekonomıkalyq jaǵdaıyna keri áserin tıgizedi. Osylaısha, ishki qurylym, júıe jáne ekonomıkalyq mehanızmder syrtqy qysymǵa tótep berýge jetkilikti qorǵanysty qamtamasyz ete almaıdy. Sondyqtan ǵylymı ekonomıkalyq áleýetti jandandyrý, ózara is-qımyl jáne keń talqylaý arqyly biz úshin qajetti jáne ońtaıly, utymdy jáne sonymen birge óte ıkemdi ekonomıkalyq modeldi ázirleý úshin jetekshi ekonomıkalyq ǵylymı-taldaý ortalyqtaryn tartý óte mańyzdy»,- deıdi Ásel Áben.

Sonymen qatar, ol jańa saıasatty qurý úshin birqatar usynys aıtty.

«Ol úshin, meniń oıymsha, birinshiden, ekonomıkanyń barlyq salalarynda atqarylǵan isterdi jáne búginde qandaı oń nátıjelerge qol jetkizgenin retrospektıvti taldaý qajet. Baza men tirek núktelerin anyqtaı otyryp, biz odan ári ósý úshin keńistikti bosatyp, jańa saıasatty qura alamyz. Sonymen qatar, qoldanystaǵy ekonomıkalyq júıe men qatynastardy qaıta qurylymdaý qajet. Bul - qoǵam úshin de, memleket úshin de óte aýyr bolýy múmkin. Biraq onsyz eski júıeden shyǵý jáne ketý múmkin emes, óıtkeni bizde qarapaıym jáne evolıýtsııalyq damýǵa ýaqyt joq»,- dep túıindedi spıker.