Qoldanystaǵy moratorıı aıasynda shekti tarıfter ózgerissiz qalady — Energetıka mınıstrligi

ASTANA. KAZINFORM — Energetıka mınıstrligi 2026–2032 jyldarǵa arnalǵan elektr energııasyna shekti tarıfterdi bekitý tártibin túsindiredi. Bul týraly vedomstvonyń baspasóz qyzmeti málim etti.

«Elektr energetıkasy týraly» Zańǵa sáıkes, jetijyldyq kezeńge tarıfterdi bekitý — qoldanystaǵy tarıfterdiń qoldanylý merzimi aıaqtalǵanǵa deıin (2025 jyldyń sońy) Mınıstrlik oryndaýǵa mindetti rásim.

— Jobada kórsetilgen (2025 jylǵy deńgeıde) tsıfrlar makroekonomıkalyq turaqtylyqty qamtamasyz etý jónindegi qoldanystaǵy tapsyrmany eskere otyryp qalyptastyrylǵan. Baǵalardy kóterýge qatysty moratorıı jaǵdaıynda Energetıka mınıstrliginiń bolashaq kezeńderge arnalǵan tarıfterdiń ósýin normatıvtik quqyqtyq aktide belgileýge zańdy quqyǵy joq. Osyǵan baılanysty, qujat qazirgi ýaqytta kúshinde turǵan shekteý sharalaryna tolyq sáıkes keletin qoldanystaǵy baǵa parametrlerin bekitedi, — delingen habarlamada.

Sonymen qatar, Qazaqstan Respýblıkasynyń zańnamasy shekti tarıfterdi túzetý mehanızmin kózdeıdi. Bul rásimdi energııalyq óndirýshi uıymdar tek ekonomıkalyq negizdelgen shyǵyndardy óteýge baǵyttalǵan obektıvti naryqtyq faktorlar ózgergen jaǵdaıda ǵana bastaı alady.

Osy rette, keıbir BAQ-ta jobany «jeti jyldyq toqtatý» retinde túsindirý qujattyń rásimdik mánin tolyq ashpaıdy. Buıryq qazirgi quqyqtyq jaǵdaıdy bekite otyryp, qoldanystaǵy moratorıı merzimi aıaqtalǵannan keıingi naryqtyq ózgeristerge den qoıý múmkindigin joqqa shyǵarmaıdy.

Qazir Energetıka mınıstrligi energııamen jabdyqtaýdyń turaqtylyǵyn qamtamasyz etý jáne tutynýshylardyń múddesin qorǵaý baǵytyn berik ustana otyryp, tarıfterdi qoldanystaǵy deńgeıde saqtap keledi.

Aıta keteıik, buǵan deıin vedomstvo benzın baǵasyn retteıtin moratorıı áli kúshinde ekenin málimdegen bolatyn.