Qoldanystaǵy Konstıtýtsııada Táýelsizdiktiń alǵashqy kezeńindegi qıyn kúnderdiń izi bar — Prezıdent

ASTANA. KAZINFORM — Qoldanystaǵy Konstıtýtsııada Táýelsizdiktiń alǵashqy kezeńindegi qıyn kúnderdiń izi bar. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

— Árıne, qazirgi Konstıtýtsııamyzdyń mán-mańyzyn eshkim joqqa shyǵarmaıdy. Sońǵy 30 jylda jetken barlyq jetistigimizdiń bastaýynda Ata Zańymyz turǵany sózsiz. Bul — tuńǵysh Prezıdent Nursultan Ábishuly Nazarbaevtyń tabandy eńbeginiń arqasy. Degenmen bul qujat elimiz endi ǵana eńsesin tikteı bastaǵan kezde qabyldanǵanyn eskergen jón. Onda Táýelsizdiktiń alǵashqy kezeńindegi qıyn kúnderdiń izi bar. Solaı bolýy da zańdy. Sol kezden beri elimiz adam tanymastaı ózgerdi. Bolashaǵymyzǵa kóbi kúmánmen qarasa da, Qazaqstan halyqaralyq bedeli joǵary, myqty memleketke aınaldy, — dedi Qasym-Jomart Toqaev.

Prezıdent qazir álemdegi geosaıası, geoekonomıkalyq, tehnologııalyq ahýal túbegeıli ózgerip jatqanyna nazar aýdartty.

— Sońǵy jyldary Qazaqstan da kóptegen ózgeristi bastan ótkerdi. Bul ózgerister ult sanasyna yqpal etti, tipti, zor silkinis ákeldi desek, qate bolmas. Sondyqtan elimizdiń maqsat-mindetterin, qundylyqtary men qaǵıdattaryn zaman talabyna saı, konstıtýtsııalyq deńgeıde jańǵyrtý aıryqsha mańyzdy, — dedi Memleket basshysy.

Keńeıtilgen otyrys barysynda Prezıdent qoǵamnyń saıası mádenıeti jáne belsendiligi artyp kele jatqanyn aıtty.