Nátıjesi joq ispen aınalysý múldem bolmaýy qajet - Prezıdent

ASTANA. KAZINFORM — Jappaı tsıfrlandyrý jáne jasandy ıntellektini engizý kómekshi qyzmet atqarýmen shektelmeı, ekonomıkalyq damýdyń basty arqaýy bolýy kerek. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

- Úkimettiń aldynda ýaqyt ozdyrmaı sheshetin birqatar mindet bar. Atap aıtqanda, turaqty ári qalypty ınflıatsııa kórsetkishin jáne memleket qarjysynyń teńgerimdiligin qamtamasyz etý, sondaı-aq byltyrǵy Joldaýymda jarııalanǵan jańa ınvestıtsııalyq kezeńdi tolyǵymen júzege asyrý. Jappaı tsıfrlandyrý jáne jasandy ıntellektini engizý kómekshi qyzmet atqarýmen shektelmeı, ekonomıkalyq damýdyń basty arqaýy bolýy kerek. JI negizinde tsıfrlandyrýdyń birqatar basty mindetterin oryndaý qajet. Bul – eńbek ónimdiligin arttyrý, ekonomıkanyń eksportqa baǵdarlanǵan sektorlaryn qalyptastyrý, qosylǵan quny joǵary ónim shyǵarý jáne Qazaqstandy jahandyq tsıfrlyq ekonomıka tizbegine kiriktirý, - dedi Prezıdent.

Memleket basshysynyń aıtýynsha, jańa ınvestıtsııalyq kezeńdi iske asyrý elimizdiń ındýstrııa, energetıka, kólik salalaryndaǵy zamanaýı júıesin qalyptastyrýǵa múmkindik beredi.

- Jasandy ıntellektini damytý, bul – uran emes, bul ekonomıkalyq ıdeologııanyń negizgi tiregi, tipti ulttyq ıdeologııamyzdyń myzǵymas tuǵyry bolýǵa tıis. Osyndaı jaýapty sátte durys, batyl ári tıimdi sheshimderdi der kezinde qabyldaý óte mańyzdy. Shynaıy ómirge túk qatysy joq «qurǵaq» usynystar berý, qysqasy, nátıjesi joq ispen aınalysý múldem bolmaýy qajet. Búkil memlekettik apparat naqty nátıjege jetý úshin jumys isteýi kerek jáne onyń ıgiligin búkil qoǵam kórýge tıis, - dedi Qasym-Jomart Toqaev.

Keńeıtilgen otyrys barysynda Prezıdent qoǵamnyń saıası mádenıeti jáne belsendiligi artyp kele jatqanyn aıtty.