Qoldanbaly etnosaıası zertteýler ınstıtýty óńirlerge monıtorıng jasap qaıtty

NUR-SULTAN. QazAqparat - QR Aqparat jáne qoǵamdyq damý vıtse-mınıstri Marat Ázilhanov Qoldanbaly etnosaıası zertteýler ınstıtýtynyń ujymymen kezdesip, ınstıtýt qyzmetiniń negizgi baǵyttaryn talqylady, dep habarlaıdy QazAqparat.

Sondaı-aq kezdesý barysynda qurylymdyq bólim basshylary esep berdi.

«M. Ázilhanov Instıtýt iske asyryp jatqan zertteý jobalaryna nazaryn aýdardy. Instıtýttyń etnosaralyq salada áleýmettanýlyq jáne analıtıkalyq zertteýler júrgizý boıynsha barlyq óńirler úshin biryńǵaı ádisnamalyq bazany qalyptastyrý qajettigin atap ótti.

Instıtýt dırektory Talǵat Qalıev etnostardyń jınaqy turatyn jerlerine monıtorıngilik sapar nátıjeleri týraly, ortalyq memlekettik jáne jergilikti atqarýshy organdar úshin naqty usynymdar ázirlenetinin atap ótti», - delingen mınıstrlik aqparatynda.

Sondaı-aq, T. Qalıev Instıtýt iske asyryp jatqan zertteý jobalaryn talqylaý boıynsha mınıstrliktiń Etnosaralyq qatynastardy damytý komıtetiniń qyzmetkerlerimen turaqty negizde jumys kezdesýlerin ótkizýdi usynǵan.

Óz kezeginde M. Ázilhanov júrgizilip jatqan zertteýlerdi aqparattyq keńistikke kontent-taldaý jasaý arqyly, statıstıka men áleýmettanýlyq zertteý qorytyndylary derekterimen nyǵaıtýdyń mańyzdylyǵyn atap ótti.

Kezdesý qorytyndysy boıynsha M. Ázilhanov Instıtýt úshin birqatar basym mindetterdi anyqtady.