Qoldan jasalǵan banknotany qalaı ajyratýǵa bolady
ALMATY. QazAqparat – Búgin QR Ulttyq valıýta kúni qarsańynda QR Ulttyq bankinde túpnusqa banknotany qalaı jalǵan aqshadan ajyratýǵa bolatyny túsindirdi, dep habarlaıdy QazAqparat tilshisi.
Bank ókilderiniń aıtýynsha, el ishinde kóbinese 2011 jyly basylyp shyqqan nomınaly 5000 teńge bolatyn banknotanyń jalǵan nusqalary jıi kezdesedi.
Jalǵan teńge kompıýterlik tehnologııanyń kómegimen jasalady.
Aqshany ajyratý úshin birneshe erejeni bilý kerek.
1. Eń aldymen banknotany ustaǵanda, qaǵazdyń shyqyrlaqtyǵy basty belgi bolady. Aqshada arnaıy mór basylady. «Qazaq Eli» monýmentiniń beınesi tusynda relef bolady. Barlyq banknotada bul relefter kózi nashar kóretin zaǵıp jandar úshin salynǵan.
2. Banknotanyń túsi anyq, aıqyn ári qanyq bolýy tıis. Jaryqqa qoıyp qaraǵanda sý belgisin, nomınaldyń tsıfrlyq beınesin kórýge bolady. Sonymen qatar, banknotanyń shetindegi magnıttik jolaq bolýy tıis. Bul jolaq jaryqqa qaraǵanda tutas bop kórinýi kerek.
3. Nomınaly 1000, 2000, 5000, 10 000 jáne 20 000 teńge bolatyn banknotalardy teris aýdarǵanda túsi qubylyp turatyn sýret bolady. Banknotany aýdaryp tóńkergende bul tús jasyldan altyn túske deıin qubylady. Osy belgilerdi 5 sekýnd ishinde anyqtap kórýge bolady. Bul azamattardy alaıaqtardyń qarmaǵyna túsip qalýdan qorǵaıtyn qarapaıym tásil.
