Qoldan toqylǵan kilemge suranys joǵary – qyzylordalyq qolóner sheberi
QYZYLORDA. KAZINFORM - Qyzylorda oblysy Syrdarııa aýdanyna qarasty Aıdarly aýylynda turatyn qolóner sheberi Roza Álbatyrovanyń kilemi 1 mln teńgege deıin satylady. Ony sheteldik azamattar arnaıy tapsyryspen aldyrady.
Búginde jasy jetpisten asqan qolóner sheberi halqymyzdyń ǵasyrdan ǵasyrǵa sozylǵan qundylyǵyn jas urpaqqa dáriptep keledi. Ózi kilem toqýdy alty jasynda ájesi men anasynan úırengen. Qazir de sol ádetinen jańylǵan joq. Qolynan shyqqan dúnıelerge qarapaıym halyq oń baǵasyn berip jatady.
«Qazir bazarǵa barsań, kilemniń neshe túrin kezdestirýge bolady. Dese de olardyń arasynda ózimizdiń kilemniń joqtyǵy qynjyltady. Bul dúnıe úıge jylýlyq pen sulýlyq syılaıdy emes pe? Kezinde úlkender biz es bilgen shaqtan qolónerdiń qyr-syryn úıretetin. Qazir barlyǵy daıyn. Eshkim qınalǵysy kelmeıtin boldy. Kilemniń túri kóp. Iran, Túrkııa elderinen kelgen kilemder kózdiń jaýyn alady. Olardyń baǵasy da qymbat», — deıdi qolóner sheberi.
Qazir aýylda qolóner sheberi úırenemin degen qyz-kelinshekterge aqyl-keńesin beredi. Áıelderdiń basyn qosyp, ulttyq dástúrdi jańǵyrtýǵa belsene atsalysyp keledi.
«Kezinde aýylda qyz-kelinshekter jıi bas qosyp, kilem toqyp, kıiz basatyn. Ókinishtisi, osy tirlikten kóz jazyp qaldyq. Qazaqstan Sheberler odaǵynyń múshesi boldym. Ashyǵyn aıtqanda, biz túkti kilemniń qadirin bilmeımiz. Kóp elde qoldan toqylǵan kilemder joǵary baǵalanady. Jyl saıyn Astanadaǵy ulttyq ónimder jármeńkege shaqyryp turady. Sol jıynnyń birinde ıtalıandyq kelinshek men toqyǵan kilemge tapsyrys berip, bireýin satyp aldy. Qazir 2×3 kólemdi túkti kilem 600 myń teńge turady. Onyń ishine jiptiń baǵasy men áıelderdiń eńbegin qosyńyz. Eki aıǵa jýyq ýaqyt jumsaımyz», — dedi R. Álbatyrova.
Qolóner sheberi qazir jip ıiretin áıelder joq ekenin aıtady. Sondyqtan daıynyn Almatydan satyp alýǵa májbúr. Jalpy, óte jumsaq bolýyna baılanysty kilem toqýǵa merınos qoıdyń júninen ıirilgen jip jaramaıdy. Aıtýynsha, jip ıiretin arnaıy qurylǵy Reseıde bar.
«Qazir elimizde maldan qyrqylǵan jún eshbir kádege jaramaı jatyr. Qadirin bilmeı jatqanymyz shyn. Qaısybir kezeńde qoıdy úsh ret toǵytyp, sodan keıin baryp júni qyrqylatyn. Qazir ustap alady da aıdalada topyraqtyń ústinde qyrqa salady. Ony tazalaý da múmkin emes, jaramsyz, tabıǵı sýǵa jýylmaǵasyn ıisi de ketpeıdi. Buryn júnniń qıqymy da qalmaıtyn. Qaı kezde de tabıǵı, taza, qoldan jasalǵan buıymǵa suranys joǵary. Jip máselesi sheshilse, tapsyrys ta kóp bolady», — deıdi kilemshi.
Qolóner sheberi shákirt tárbıeleýge basa nazar aýdaryp keledi. Sonyń biri — óziniń nemeresi Aqmaral, ol M. Mámetova atyndaǵy pedagogıkalyq joǵary kolledjin bitirip, aýylda úıirme ashypty. Al 3 jasynan kilem toqýdy úırenip kele jatqan Qyrmyzy atty nemeresi ájesiniń janynan bir eli qalmaıdy. Óziniń qyzyǵýshylyǵy da joǵary.
