Qoldan-qolǵa satylatyn batýttarda paıdalaný nusqaýlyqtary joq - Bekker
NUR-SULTAN. QazAqparat - QR ІІM Tótenshe jaǵdaılar komıtetiniń tóraǵasy Vladımır Bekker batýttardyń qaýipsizdigin baqylaý máselesi qalaı rettelip jatqanyn aıtyp berdi, dep habarlaıdy QazAqparat tilshisi.
«Batýttarǵa qatysty baqylaý bastalady (ulttyq standart boıynsha 1 shildeden bastap). Biraq, qazirdiń ózinde baqylaý joq deýge kelmes. Barlyǵy da nusqaýda jazylǵan. Máselen, siz dúkennen kez kelgen turmystyq qurylǵyny satyp alsańyz, qorapshasynyń ishinde ony qalaı paıdalaný kerektigi týraly nusqaýlyǵy jatady. Ol nusqaýlyqtyń alǵashqy sóıleminde «osyny oqymaı qurylǵyny paıdalanbańyz» delingen. Batýttarda da sondaı. Ekinshi másele, eger batýt jumys istep tursa, ol sertıfıkattalyp, qaýipsizdik sharttaryna saı kelýi tıis. Qaraǵandydaǵy jaǵdaıda sertıfıkat boldy ma? Muny tergeý anyqtaıdy. Biraq, meniń oıymsha, adamdar bir-birinen satyp ala beretindikten, atalmysh batýttyń qujaty joq bolýy múmkin», - dedi komıtet tóraǵasy ІІM-de ótken baspasóz máslıhatynda.
Vladımır Bekker batýttarǵa qatysty rolıkterdi YouTube jelisinen arnaıy kórgenin aıtady.
«Óndirýshi baǵa, bılet qansha bolýy kerektigi jaıly barlyǵyn aıtyp beredi. Biraq, shyntýaıtynda tehnıkalyq talaptardan bólek, onda bekitý erejeleri, paıdalaný sharttary da bolýy tıis. Bir batýtta 3 jastaǵy jáne 15 jastaǵy bala bir ýaqytta sekirip júrmeýi kerek. ıAǵnı, jas boıynsha, salmaq boıynsha sanattar bolýy tıis. Oılap qarasańyz, 60 kelilik bala batýtqa sekirip qalsa, 10 kelilik bala syrtqa ushyp ketýi múmkin», - dedi ol.
Sonymen qatar, komıtet tóraǵasy «Ata-analarǵa balalardy batýtqa aparýǵa keńes berer me edińiz?» degen suraqqa jaýap berdi.
«Menińshe, aparmaı toqtata turý kerek. Buǵan deıin aıtqanymdaı, bizde syrttaı qalypty kórinetin jaǵdaılar barshylyq. Barlyq ata-anaǵa jaǵdaıǵa, qaýip deńgeıine, aýa raıy men batýttyń jaǵdaıyna baǵa bergen durys der edim. Aqsha úshin ǵana qoıyldy ma, tehnıkalyq personaly tolyq pa, bir jaǵdaı bolyp qalsa, kómek ýaqytynda kele me - bárine baǵa berilýi tıis. Qurylǵy qalaı ornatylǵanyn kórý kerek», - dedi ol.
Aıta ketsek, Qazaqstanda balalar attraktsıondarynyń jumysyn retteý erejesi ázirlenip jatqanyn Vladımır Bekker buǵan deıin aıtqan bolatyn.
