Qoldan esirtki jasaǵan óskemendik sottaldy
ÓSKEMEN. QazAqparat - Óskemenniń turǵyny aspazdyq maqsatqa paıdalanylatyn kóknárden esirtki daıyndaǵany úshin 3 jylǵa sottaldy, dep habarlaıdy QazAqparat tilshisi.
Óskemendik K. esimdi azamat Gagarın kóshesinde turatyn tanysyn zańsyz jolmen esirtki jasaýǵa kóndirgen. Ońaı aqsha tapqysy kelgen tanysy usynysty qup alyp, K-ny qasyndaǵy serigimen birge páterine kirgizgen. Keıin olar kóknárdiń tamaq daıyndaý úshin satylatyn tuqymyn qaınatyp, býlandyrý arqyly esirtki daıyndaǵan. Tundyrylǵan 10 gramm esirtki suıyqtyǵynan ózine bir shprıts qaldyrady da, qalǵanyn eki tanysyna beredi.
Sot azamat K-ǵa múlkin tárkileýsiz úsh jylǵa bas bostandyǵynan aıyrý jazasyn taǵaıyndady. Sondaı-aq, ol memleket qazynasyna 142105 teńge sot shyǵynyn óteýge mindetteldi.
