Qolda bar nárseni qadirleı bilý kerek - ardager Altynaı Esbolatova

TALDYQORǴAN. QazAqparat - Uly Jeńis merekesi qarsańynda Almaty oblysynyń ákimi Amandyq Batalov Taldyqorǵan qalasynda turatyn Ekinshi dúnıejúzilik soǵysy ardagerleri Ábish Oshaqbaıuly, Altynaı Esbolatova, Sársenbaı Qańtarbaı aqsaqaldyń úılerine arnaıy baryp quttyqtap, gúl shoqtary men merekelik syılyqtar tapsyrdy, dep habarlaıdy QazAqparat tilshisi.

A. Batalov quttyqtaýyn 96 jastaǵy Ábish Oshaqbaıulynyń shańyraǵynan bastady. Ardager maıdandaǵy erligi úshin Qyzyl Juldyz, І dárejeli Otan soǵysy, Qurmet belgisi ordenderimen, «Germanııany jeńgeni úshin», «Stalıngradty azat etkeni úshin», «Maıdandaǵy erligi úshin» medaldarymen marapattalǵan. Qarııamen áńgimelesken Amandyq Batalov aqsaqalǵa uzaq ǵumyr, myqty densaýlyq tiledi. Ardagerge arnap qala mektepteriniń oqýshylary Otan, erlik jaıly óleńder oqydy. Munan soń oblys ákimi «Paravoz apa» atanyp ketken Altynaı Esbolatovany merekesimen quttyqtaýǵa bardy. Mataı stansasynyń týmasy Altynaı apa soǵys kezinde áskerı poıyzda mashınıst bolǵan. Maıdandaǵy jyldardy esine alǵan Altynaı apa jeńiske jetkizgen Otanǵa degen sheksiz súıispenshilik pen birlik ekenin atap ótti.

«Eń bastysy - jaqsy oqyńdar, tárbıeli bolyńdar, ata-analaryńnyń qýanyshy, Otannyń tiregi bolyńdar. Bilim - barlyq ıgiliktiń kilti. Qolda bar nárseni qadirleı bilý kerek, bar múmkindikti paıdalana bilý kerek. Balalardyń biz kórgen qıyndyqty kórmeı, bolashaqtary jarqyn bolýyn tileımin! Osy kúnge jetkenime shúkirshilik etemin. Qazir halyq beıbitshilik pen tynyshtyqta jaqsy ómir súrip jatyr, kıimi kók, qarny toq. Sondyqtan Elbasymyzǵa rızamyn. Barlyǵyńa zor densaýlyq tileımin», - dedi Altynaı apa.

Budan ári quttyqtaý Sársenbaı Qańtarbaı aqsaqaldyń úıinde jalǵasty. Maıdan dalasyndaǵy erligi eskerilip, Sársenbaı qarııaǵa І jáne ІІ dárejeli Ula Otan soǵysy ordenderi, «Erligi úshin» medali jáne basqa da nagradalar berilgen. Sonymen qatar ardager beıbit ómirdegi eseli eńbegi úshin de birqatar marapattarǵa ıe bolǵan.