Qolaısyz aýa raıynan Atyraý oblysynyń Jylyoı aýdanynda jaryq sónip qaldy
«Kegok» AQ batys júıearalyq toraptary Atyraý óńirlik fılıalynyń dırektory Konstantın Chernohaevtyń aıtýynsha, 13 shilde saǵat 23:00-de Jylyoı aýdanynyń eldi mekenderi tolyǵymen elektr qýatynan ajyratylǵan.
«Elektr energııasynyń óshýine Kegoc-220, Teńiz-220 jáne Qulsary-220 jelisindegi apatqa baılanysty Jylyoı aýdany tolyqtaı toq kózinen ajyratyldy. Jergilikti ýaqytpen saǵat 23:30-dan bastap elektr energııasy ishinara berilip jatyr», - dep habarlady Konstantın Chernohaev.
Jylyoı aýdany ákiminiń orynbasary Gúlnafıs Aıshýaqova Qulsary qalasynda, bir kent pen aýyldyq okrýgterde elektr qýaty bolmaǵanyn rastady.
Atyraý oblysynyń energetıkalyq kesheni baspasóz qyzmetiniń málimetinshe, tabıǵattyń tosyn qubylysynan keshe, 13 shildede tús qaıta Atyraý qalasynyń Talqaırań-2 shaǵyn aýdanynda jeke turǵyn úıdiń shatyry ushqan. Sonyń saldarynan Atyraý qalalyq turǵyn úı-kommýnaldyq sharýashylyq bóliminiń teńgerimindegi 0,4 kV áýe elektr jelisi búlingen.
Eske sala ketelik, budan buryn Atyraýda birneshe shaǵynaýdanda jaryq sónip qalǵanyn jazǵan edik.
«Atyraý qalasynda Jaıyq ózeniniń sol jáne oń jaǵalaý bóligindegi «Balaýsa», «Rakýsh», «Leshoz», «Avangard» pen «Nursaıa», «Jeruıyq» shaǵynaýdandarynda apattyq jaǵdaı tirkeldi. Soǵan baılanysty ýaqytsha jaryq bolmaıdy. Apattyń sebebi anyqtalyp, qalpyna keltirilgen soń jaryq tolyqtaı beriledi», - dep habarlaǵan edi energetıkalyq keshenniń baspasóz qyzmeti.
Keıin elektr qýatynyń joqtyǵynan Atyraý munaı óńdeý zaýyty jumysyn toqtatty.
Sondaı-aq jergilikti energetıkter atyraýlyqtar nelikten jaryqsyz qalǵanynyń sebebin aıtyp bergen bolatyn.
