Qolaısyz aýa raıynda aqyly jol aqysy arzandamaıdy – QazAvtoJol

ASTANA. KAZINFORM – Qar men boran kezinde aqyly avtomobıl joldarynda qozǵalys jyldamdyǵy 50–60 km/saǵ deıin tómendese de, júrgizýshiler jolaqyny tolyq kólemde tóleı beredi. Qoǵamda qyzý talqylanǵan osy máselege qatysty Kazinform agenttiginiń resmı saýalyna «QazAvtoJol» ulttyq kompanııasy jaýap berdi.

Kompanııanyń habarlaýynsha, qolaısyz aýa raıyna baılanysty engiziletin ýaqytsha jyldamdyq shekteýleri jol qozǵalysy qaýipsizdigin qamtamasyz etý maqsatynda ǵana qoldanylady jáne mundaı jaǵdaıda jolaqy tólemin tómendetý nemese alyp tastaý tetigi zańnamada qarastyrylmaǵan.

– Aýa raıy jaǵdaılaryna baılanysty engizilgen jyldamdyq shekteýleri jol ýchaskesiniń aqaýy bar dep tanýǵa negiz bolmaıdy. Sondyqtan bul kezeńderde alynǵan tólemdi qaıta esepteý nemese qaıtarý múmkin emes, – delingen resmı jaýapta.

Sondaı-aq «QazAvtoJol» aqyly jolda aqaý anyqtalǵan jaǵdaıda ǵana tólem alynbaıtynyn naqtylady. Bul rette aqaý dep jol jamylǵysy nemese ınfraqurylym elementteriniń paıdalanýǵa jaramsyz kúıi ýákiletti memlekettik organdardyń sheshimimen resmı túrde rastalǵan jaǵdaılar esepteledi. Al qar, boran, kóktaıǵaq kezinde jyldamdyqty tómendetý mundaı sanatqa jatpaıdy.

Kompanııa málimetinshe, qoldanystaǵy tártipke sáıkes tólemdi avtomatty túrde qaıtarý mehanızmi joq, al jyldamdyq shekteýleri kezeńinde júrgizýshilerge qaıtarylǵan qarajat boıynsha statıstıka múlde júrgizilmeıdi.

Budan bólek, aqaýy bar aqyly jol ýchaskeleriniń tizimi tek tehnıkalyq tekserýler tolyq aıaqtalǵannan keıin jáne resmı túrde bekitilgen soń «QazAvtoJol» ulttyq kompanııasynyń resmı resýrstarynda jarııalanady.

Osylaısha, aqyly joldy 120 km/saǵ jyldamdyqpen júrip, ýaqyt utý úshin paıdalanǵysy keletin júrgizýshilerdiń basty saýalyna kompanııanyń jaýaby qysqa – «qarly boran jolaqy tólemin alyp tastaýǵa negiz emes».

Aıta keteıik, joldary qaýip týdyrýy yqtımal óńirler jóninde jazǵan edik.