Qolaısyz aýa raıy: Oralǵa keletin ushaqtar keıinge qaldyryldy

Qolaısyz aýa raıyna baılanysty Oralǵa keletin ushaqtar keshigip jatyr, dep habarlaıdy Kazinform.

«Oral halyqaralyq áýejaıy» JShS baspasóz qyzmetinen málim etkenindeı, 3 jeltoqsan kúni Oral-Astana baǵyty boıynsha 7366 reısi keshiktirildi.

Sondaı-aq Almaty-Oral baǵyty boıynsha 7169 reısi Aqtóbedegi qosalqy áýe aılaǵyna qondy.

«Búgin Almatydan 881 reısi keıinge qaldyryldy. Oralǵa kelýiniń boljamdy ýaqyty - 16.00. Oǵan qosa Almatydan 7165 nómirli taǵy bir reıs eki saǵatqa keshiktirildi. 3 jeltoqsan kúngi saǵat 18.00-den 4 jeltoqsan tańǵy 04.00-ge deıin muzdaq jaýdy. Búgin tańda temperatýranyń - 3-ten + 6 gradýsqa deıin kúrt aýysýyna baılanysty tuman qosyldy. Tumanǵa baılanysty kórinýdiń qıyndyǵy ushýǵa shekteý bolyp tabylady. Osyǵan baılanysty áýe kompanııalary atalǵan reısterdi keıinge qaldyrý jóninde sheshim qabyldady», dep habarlady vedomstvodan.

Eske sala keteıik, budan buryn Oralda aýa raıyna baılanysty ushaqtar ushpaı jatqanyn jazǵan bolatynbyz.