«Qolaıly mektep» jobasy: 2025 jylǵa deıin 500-den astam mektep salynady

NUR-SULTAN. QazAqparat – QR Qarjy mınıstri Erulan Jamaýbaev Prezıdent tapsyrǵan Ulttyq jobalardyń qalaı iske asyrylatynyn aıtty, dep habarlaıdy QazAqparat tilshisi.

«Qolaıly mektep» ulttyq jobasy sheńberinde oqýshy oryndarynyń tapshylyǵyn sheshý úshin 2023-2025 jyldary 588 tolyq jınaqty mektep salý josparlanyp otyr. Qurylys obektileriniń qunyn esepteý jańa tehnıkalyq tapsyrmaǵa jáne 1 oqýshy orny úshin shyǵyndarǵa sáıkes anyqtaldy», -dedi mınıstr Úkimet úıinde ótken baspasóz máslıhatynda.

Sonymen birge, «Aýyldyq densaýlyq saqtaýdy jańǵyrtý» ulttyq jobasyn iske asyrýǵa 215 mlrd teńge qajet dep boljanýda. Bul rette osy sharalardy iske asyrýǵa arnalǵan shyǵyn kólemi jalpy sıpattaǵy transfertterdi jáne 2023-2025 jyldarǵa arnalǵan respýblıkalyq bıýdjetti qalyptastyrý aıasynda qosymsha pysyqtalady.

«Budan basqa Memleket basshysynyń salyq jáne bıýdjet saıasatyn jetildirý jónindegi tapsyrmasy Ulttyq ekonomıka mınıstrligimen jáne Strategııalyq josparlaý jáne reformalar jónindegi agenttikpen birlesip iske asyrylady. Úkimettiń keńeıtilgen otyrysynda qoıylǵan barlyq tapsyrmalar sapaly jáne ýaqtyly oryndalady. Bul rette, Prezıdent bastamalaryn iske asyrýǵa arnalǵan shyǵystar kólemi bıýdjettik baǵdarlamalar ákimshilerimen birlesip pysyqtalady», - dedi E. Jamaýbaev.

Keshe Úkimettiń keńeıtilgen otyrysynda Prezıdent Qasym-Jomart Toqaev eki ulttyq joba ázirlenip jatqanyn aıtqan edi.