Qolaıly baǵa men sapaly ónim: Astanada aýyl sharýashylyǵy jármeńkesi ótip jatyr

ASTANA. KAZINFORM — Astanada demalys kúnderine arnalǵan kezekti qalalyq aýyl sharýashylyǵy jármeńkesi ótip jatyr, dep habarlaıdy qala ákimdiginiń resmı saıty.

Jármeńke 14 jáne 15 aqpan kúnderi saǵat 10:00–den 19:00–ge deıin Keryen Joly saýda ortalyǵynda (Alash tasjoly, 35B) jumys isteıdi.

Munda Qazaqstannyń túrli óńirlerinen kelgen fermerler men óndirýshiler óz ónimderin usyndy. Saýda sórelerinde kókónister men jemis-jıdekter, et jáne et ónimderi, sút jáne un ónimderi, jańa pisken toqashtar, tabıǵı shyryndar, tosaptar men djemder jáne basqa da taýarlar tıimdi baǵada satylyp jatyr.

Astana qalasy Investıtsııalar jáne kásipkerlikti damytý basqarmasynyń bas mamany Arna Berikovtiń aıtýynsha, qalalyq aýyl sharýashylyǵy jármeńkeleri turǵyndardy otandyq óndiristiń sapaly ári qoljetimdi ónimderimen qamtamasyz etýge baǵyttalǵan.

— Fermerler men óndirýshilerden tikeleı jetkizilimderdiń arqasynda deldaldyq ústemeaqylar azaıtylady, bul baǵa turaqtylyǵyna oń áser etedi. Jármeńkelerdi ótkizý jergilikti taýar óndirýshilerdi qoldaýǵa yqpal etedi jáne elordanyń azyq-túlik qaýipsizdigin qamtamasyz etý boıynsha keshendi jumystyń mańyzdy bóligi bolyp sanalady, — dedi ol.

Jármeńkege kelýshilerdiń yńǵaılylyǵy úshin atalǵan orynǵa № 7, 11, 39, 41, 45, 53, 59, 81, 307 jáne 317 baǵyttaǵy avtobýstar qatynaıdy.

Osydan buryn Astanada sý tasqynyna qarsy aýqymdy sharalar júrgizilip jatqanyn jazdyq.