Qolastyndaǵylardy 1,5 saǵat boıy balaǵattady delingen ákimniń ústinen qyzmettik tergeý bastaldy

ASTANA. QazAqparat – Memlekettik qyzmet isteri agenttigi Batys Qazaqstan oblysy Báıterek aýdanynyń ákimi Marat Toǵjanovtyń ústinen qyzmettik tergeý bastady. Buǵan deıin áleýmettik jelide onyń qolastyndaǵylardy balaǵattaǵan aýdıosy taraǵan bolatyn, dep habarlaıdy QazAqparat tilshisi.

Bul jaıynda agenttiktiń baspasóz qyzmeti resmı málimet taratty.

«Buqaralyq aqparat quraldarynda memlekettik qyzmetshilerge qatysty jarııalanǵan materıaldarǵa monıtorıng júrgizý barysynda 23 qarasha kúni birqatar áleýmettik jelilerde (Instagram, Telegram, TikTok) Batys Qazaqstan oblysy Báıterek aýdanynyń ákimi Marat Toǵjanovtyń tóraǵalyǵymen ótken májilistiń aýdıojazbasy anyqtaldy. Memlekettik qyzmetshilerdiń moraldyq-ádep beınesine qoıylatyn talaptar Qazaqstan Respýblıkasy memlekettik qyzmetshileriniń ádep kodeksinde aıqyndalǵan. Memlekettik qyzmetshiler áriptesterimen qyzmettik qarym-qatynasta dórekilik, qadir-qasıetin kemsitý, ádepsizdik jáne beıádep minez-qulyq faktilerine jol bermeýge tıis. Osyǵan oraı Memlekettik qyzmet isteri agenttigi atalǵan laýazymdy tulǵaǵa qatysty qyzmettik tergep-tekserý sharalaryn júrgizip jatyr. Sonyń qorytyndysy negizinde tıisti sheshim qabyldanady», - dep jazylǵan agenttiktiń málimetinde.

Jelidegi málimetterge qaraǵanda, oqıǵa bıyl naýryz kezinde bolǵan. Al aýdıo jelide birer kún buryn ǵana tarady.

Foto: Báıterek aýdanynyń ákimdigi