Qolastyndaǵy qyzmetkeri para alǵany úshin SQO ákiminiń orynbasary men aýdan ákimi jumystan ketti

PETROPAVL. QazAqparat – Soltústik Qazaqstan oblysynda basqarma basshysy men aýdan ákimi orynbasary para alǵany úshin olardyń tikeleı basshylary qyzmetinen alyndy, dep habarlaıdy QazAqparat tilshisi.

SQO ákimi baspasóz qyzmetiniń málimetinshe, qolastyndaǵy qyzmetkerdiń sybaılas jemqorlyq qylmysqa jol bergeni úshin basshynyń derbes jaýapkershiligi zańyna sáıkes laýazymdy tulǵalar - SQO ákiminiń orynbasary Anton Fedıaev pen Aqjar aýdanynyń ákimi Erbatyr Madıarov qyzmetterinen ketti. Oblys ákimi Qumar Aqsaqalov Prezıdent Ákimshiliginiń kelisimimen buıryqqa qol qoıdy.

Esterińizge sala keteıik, Soltústik Qazaqstan oblysy ákimdiginiń memlekettik sáýlet-qurylys baqylaý jáne lıtsenzııalaý basqarmasynyń basshysy Batyrbek Qalabaev jalpy somasy 650 myń teńge shamasynda para aldy dep kúdikke ilingen edi.

Ol Aqjar aýdany Talshyq aýylynda salynyp jatqan dene shynyqtyrý-saýyqtyrý keshenin salý barysynda sybaılas jemqorlyqqa jol bergen.

Sot eks-jetekshini jáne osy qylmysqa qatysy bar aýdan ákiminiń burynǵy orynbasary Qural Dosymbekovti aıypty dep tanyp , úkim zańdy kúshine endi.