Qola medalimdi jeńisimdi kóre almaı ketken baýyryma arnaımyn – Ishar Kýrbaev
ASTANA. KAZINFORM — Qazaqstandyq balýan Ishar Kýrbaev Astanada ótip jatqan álem chempıonatynda qola júldege qol jetkizdi.
Otandasymyz jarystan keıin QR Ulttyq olımpıadalyq komıteti baspasóz qyzmetine bergen suhbatynda qoldaý kórsetken jankúıerlerge alǵys aıtyp, otbasynda bolǵan qaıǵyly oqıǵaǵa toqtaldy.
- Osyndaı qoldaýdy seze turyp, jeńilip qalý qıyn eken. Sondyqtan maǵan qoldaý kórsetken barsha janǵa alǵysymdy bildiremin. 55 kelide kúresý úshin salmaq tastadym. Alǵa qoıǵan basty maqsatym - altyn medal alý edi. Degenmen qola medal buıyryp tur eken. Alǵashynda segiz keli salmaqty qalaı tastaımyn dep alańdadym. Óıtkeni bul bir-eki aıda atqarylatyn jumys emes. Jyl basynan beri kóp eńbek ettik. Negizi, buǵan deıin 60 kelide kúresip júrdim. Alaıda álem chempıonaty óz elimizde ótetin bolǵandyqtan, shynymdy aıtsam, 55 kelide múmkindik kóbirek boldy. Jartylaı fınalda taktıkalyq turǵydan qatelik jol berip, qarsylasyma ese jiberdim. Ókinishke qaraı, osy jarysqa az ýaqyt qalǵanda Jiger esimdi baýyrym, bólem dúnıeden ótti. Onyń meniń jeńisimdi kóre almaı ketkeni óte ókinishti. Osy qola medalimdi baýyryma arnaımyn, - dedi Kýrbaev.
Qazaqstandyq balýan Ishar Kýrbaev álem chempıonatynyń qola júldegeri atanǵanyn jazǵan edik.
