Qola medal alǵan belgııalyq fýtbolshylar qandaı syıaqy alady
ASTANA. QazAqparat - Belgııa Fýtboldan álem chempıonatynda el tarıhynda alǵash ret qola medal jeńip alǵan ulttyq qurama komandasyna zor qurmet kórsetýde, dep habarlaıdy QazAqparat tilshisi.
Aıta keterligi, Belgııa quramasy 1986 jyly Meksıkada ótken Fýtboldan álem chempıonatynda tórtinshi oryn alǵan bolatyn. Al bul chempıonatta Ulybrıtanııa quramasyn 2-0 esebimen tize búktirip, júldeli orynǵa taban tiregen edi.
Búgin tús aýa qola júldegerler korol saraıyna bet alady. Onda fýtbolshylardy el patshasy Fılıpp pen Matılda hanshaıym quttyqtaıdy. Osydan keıin qurama komanda músheleri tóbesi ashyq avtobýspen Brıýsseldiń bas alańy «Gran-Plasqa» bet alady. Sol jerde eldiń halyq birligi kúnin toılaý sharasyna qatysady.
«Gran-Plasta» oryn jetpegen turǵyndarǵa qalalyq bılik úlken ekran jasap qoıǵan. Kórermender resmı sharalar aıaqtalǵannan keıin Frantsııa men Horvatııa arasyndaǵy álem kýbogynyń fınaldyq oıynyn kóre alady.
Brıýssel kóshelerine halyq batyrlaryna qurmet kórsetý úshin júz myńdaǵan jankúıler shyǵady dep kútilýde. Kesheden beri búkil qala turǵyndary ulttyq quramanyń qara-sary-qyzyl tústi kıim úlgisin kıip alǵan.
Aıta keterligi, Koroldik belgııalyq fýtbol odaǵy 1895 jyly qurylǵan. Álem chempıonatynda úshinshi oryn alǵany úshin Belgııa quramasy FIFA-dan 20,7 mln eýro alady. Atalǵan qarjydan qurama komandanyń bas bapkerine 750 myńnan 1 mln eýroǵa deıin bonýs tólenedi. Al árbir oıynshy qola medal úshin 312 myń eýrodan alady.
Esterińizge sala ketsek, 14 shildede fýtboldan 2018 jylǵy álem birinshiliginiń qola júldegeri anyqtaldy. Bul qurmetti ataq Belgııa quramasyna buıyrdy. Belgııalyqtar Anglııany 2:0 esebimen tize búktirdi.
Osylaısha Belgııa óz tarıhynda tuńǵysh ret júldegerler qatarynan kórinip otyr. Buǵan deıingi olardyń atalmysh dop dodasyndaǵy eń joǵary jetistigi - 1986 jylǵy álem birinshiliginde tórtinshi oryn alýy. Sondaı-aq, Belgııa Eýropa birinshiliginde 1980 jyly kúmis júldeger atanǵan edi. Aıta keterligi, Belgııa Anglııadan toptyq kezeńde de 1:0 esebimen basym túsken edi. Belgııa men Anglııa arasynda búginge deıin 22 kezdesý ótken eken. Belgııa kóp jaǵdaıda aǵylshyndarǵa ese jiberdi. Nebári 2 kezdesýde jeńiske jetken. Alǵashqysy 1936 jyly bolǵan joldastyq kezdesý. Onda Belgııa 3:2 esebimen myqtylyǵyn tanytty. Odan keıingi jeńis bıylǵy toptyq kezeńde boldy. Al 15 oıynda aǵylshyndar jeńis toıyn toılaǵan. Sondaı-aq, 5 kezdesý teń aıaqtalǵan.
