«Qola»: Qazaqstan Azıadadaǵy 55-shi medaline qol jetkizdi

ASTANA. QazAqparat - Qazaqstan Azıadadaǵy 55-shi medalin jeńip aldy, dep habarlaıdy QazAqparat Ulttyq olımpıada komıetiniń baspasóz qyzmetine silteme jasap.

Azııa oıyndarynyń qola medaline batýtta sekirý sheberi Pirmammed Álıev qol jetkizdi.  

Sportshy biliktiligin dáleldeý kezinde jarysty altynshy orynda aıaqtaǵan bolatyn. Soǵan qaramastan, jınaǵan upaı sany Pirmammed Álıevtiń fınalǵa shyǵýyna múmkindik berdi. Ol eki ret óner kórsetip, 103.470 upaı jınady.

Fınalda árbir sekirýshi tek bir ret qana óner kórsetýge tıis bolatyn. Tóreshiler qazaqstandyq sportshynyń sheberligin 57.460 upaımen baǵalady. Bul onyń úshinshi oryndy jeńip alýyna múmkindik berdi.

Altyn medaldi 59.460 upaımen qytaılyq Dong Dong ıelendi. Ekinshi oryn da qytaılyqtardyń qanjyǵasynda ketti. Leı Gao 59.220 upaımen kúmis júldege ilikti.