Qol kúresinen ashyq Azııa kýbogynan batysqazaqstandyqtar oljaly oraldy
ORAL. QazAqparat - Taraz qalasynda qol kúresinen ótken ashyq Azııa kýbogy jarysynan batysqazaqstandyq sportshylar oljaly oraldy, dep habarlaıdy «QazAqparat» tilshisi.
Qol kúresinen BQO quramasynyń aǵa jattyqtyrýshysy Murat Ibatovtyń aıtýynsha, atalmysh jarysqa Reseı, Latvııa, Bolgarııa, Horvatııa, Úndistan, Japonııa, Qyrǵyzstan, Tájikstan, Ózbekstan, Iran, Germanııa, Grekııa, Chehııa, Qazaqstan, barlyǵy 14 elden 400 sportshy qatysyp, baq synady.
Múmkindigi shekteýli jandar arasynda arm-1 (múgedek arbasynda otyratyndar) tobynda batysqazaqstandyq Azon Shaımardanov +75 kg salmaqta qarsylas shaq keltirmeı, chempıon atandy. 53 jastaǵy Azon Shaımardanov ekinshi toptaǵy múgedek bolǵanyna qaramastan, birneshe sport túrimen dendep aınalysýmen birge múmkindigi shekteýli jandarǵa arnalǵan sport klýbynda aǵa bapker bolyp qyzmet etedi. Ol - otyryp voleıbol oınaýdan sport sheberi, sondaı-aq paýerlıftıngten halyqaralyq dárejedegi sport sheberi. Qol kúresinen 2016 jyly Tashkentte jáne bıyl Qyrǵyzstanda ótken Azııa birinshiliginde qos qola medaldan ıelengen Azon Shaımardanov endi, mine, chempıondyq ataqqa qol jetkizip otyr. Ashyq Azııa kýbogynda sol sekildi Oraldaǵy №4 balalar-jasóspirimder sport mektebiniń tárbıelenýshileri Kenjeqyz Qaýpenova jastar arasynda 65 kg salmaqta, áıelder arasynda Ásel Jumaǵambetova 80 kelide ekinshi, al Janna Qaztýǵanova 55 kelide úshinshi orynǵa kóterildi. Bul sportshylardyń jeke bapkeri - Murat Ibatov.
Taǵy bir oraldyq jas sportshy Anel Alshynova jasóspirimder arasynda 55 kg salmaqta qola júldege ilikti. Onyń bapkeri - Raýan Amangeldıev.
El namysyn Nurhat Nysanov jattyqtyratyn Qaratóbe aýdandyq balalar-jasóspirimder sport mektebiniń tárbıelenýshileri de sátti qorǵady. Farhat Qalıev jastar arasynda +95 kg salmaqta úshinshi orynǵa kóterilse, múmkindigi shekteýli jandar arasynda (arm-4) Eseneı Jaqypov 75 kg salmaqta kúmis júldeger atandy.
