Qol kúresinen 27 dúrkin álem chempıony Endrıý Rodos shardaralyq sportshylarmen kezdesti

Shardara aýdanynda ótken kezdesýge Malaızııa memleketiniń armrestlıng federatsııasynyń Prezıdenti, halyqaralyq dárejedegi tóreshi Zıl Fadlı de qatysty, dep habarlaıdy QazAqparat tilshisi.

Álemge «Kobra» degen laqap atpen tanymal bolǵan Endrıý Rodos pen malaızııalyq qonaq Shardara aýdany sportshylarynyń tynys-tirshiligimen tanysty.

Sheteldik qonaqtardy aldymen aýdan ákimi Bolatbek Qystaýov qabyldap, olarǵa syı-qurmet jasady. Qonaqtarǵa qazaqtyń salty boıynsha shapan jaýyp, baǵaly syılyqtar tartý etti. Munan keıin qonaqtar byltyrǵy jyly Shardara jerinde ashylǵan oblystyq №4 olımpıada rezervine mamandandyrylǵan balalar-jasóspirimder sport mektebine bardy.

Óńirdegi armrestlıng sportynyń negizin qalaǵan tanymal sportshy Arman Qarsybaev qonaqtardy ózi basshylyq jasaıtyn oblystyq sport mektebiniń jaı-kúıimen tanystyryp shyqty. Endrıý Rodos pen Zıl Fadlı «Shardara Armsport» sport klýbynda jattyǵatyn ul-qyzdar men jattyqtyrýshylardyń jankeshti eńbekterin, talapqa saı jabdyqtalǵan zaldar men sportshylar ıgiligi úshin jasalynyp otyrǵan qyrýar tirlikterge ábden rıza boldy. Ondaǵy sportshylardyń boıynan jalyndaǵan kúsh-jigerdi kórgen sheteldik sport sańlaqtary Arman Qarsybaev bastaǵan jattyqtyrýshylardyń jumystaryna joǵary baǵa berdi.