Qol qoımasań, kózińdi qurtamyn dep qorqytty - Hrapýnovtyń eks-orynbasary
ALMATY.QazAqparat -Vıktor Hrapýnovtyń orynbasary zańsyz satylym barysyn áshkere qyldy. Ol jer telimderi men jyljymaıtyn múliktiń Hrapýnov pen onyń týystarynyń menshigine qalaı ótkenin ótkenin sotta aıtyp berdi, dep habarlaıdy QazAqparat tilshisi.
Sottalýshy ıAkov Zaıats 1998-2004 jyldary Almatynyń eks-ákimi Vıktor Hrapýnovtyń orynbasary bolyp qyzmet atqarǵan. Ol sáýlet salasynda, jol jóndeý, jolaıryqtar salýda jetekshilik etken. Sondaı-aq jer qatynastary jáne qala qurylysy máseleleri jónindegi komıssııa múshesi bolǵan.
Emen baǵyn jeke menshik ıesine satý týraly hattamaǵa qol qoıǵan ol jaýap alý kezinde istegen isin moıyndap, ókinish bildirdi.
«Másele bul aýmaqta jyljymaıtyn múliktiń jalǵa berilýinde. Jyljymaıtyn múlik satylyp ketkende, jer qatynastary komıssııasynyń mindeti - jer telimi ıesin ózgertý edi. Buryn bul jer qalalyq atqarýshy komıssııanyń demalatyn orny bolatyn. Hrapýnov mundaı sheshim qabyldaǵan kezde meni shaqyryp, bylaı dedi: «Partııalyq obektilerdiń bárin burynǵydaı jekeshelendirý kerek. Kásipodaqtaǵylar Shymbulaq pen Medeýdi jekeshelendirdi». Men túbegeıli qarsy boldym. Ol meni komıssııa quramyna kúshtep qosty. Meniń aldyma qol qoıylǵan qujatty tastady. Onda komıssııanyń qoly da qoıylǵan bolatyn. Onyń qysymymen jer teliminiń maqsatty baǵyty ózgergeni týraly jer qatynastary komıssııasynyń sheshimine qol qoıýǵa májbúr boldym», - dedi ıAkov Zaıats.
Sottalýshy taǵylǵan aıyptyń bárimen kelisetinin aıtty.
«Bul kórsetkishterdi moıyndaımyn. Munyń bári Hrapýnovtyń qysymymen bolǵan. Meniń syrtymnan qoıylǵan qolǵa kelisim berýge májbúr boldym. Ol meniń qujattarǵa qol qoıýymdy suraǵan kezde hattamada menen basqasynyń báriniń qoly boldy. Kelisim kezinde jer qatynastary jáne qala qurylysy komıssııasy ókilderi, qalanyń bas sáýletshisi, jer resýrstary jónindegi qalalyq komıtet departamenti, tabıǵatty qorǵaý mekemeleriniń ókilderi jáne zańgerler boldy»,-dedi aıyptalýshy.
Zańbuzýshylyq ekenin bile tura, qujatqa nege qol qoıǵanyn suraǵan prokýrorǵa ol oqıǵanyń qysym men qorqytý arqyly júzege asqanyn aıtty.
«Ol meni qyspaqqa alyp, qorqytty. Ol kezde ota jasatqaly júrgenmin. Men kelisimimdi berdim. Jáne ol úshin aıyptymyn. «Men seni ornyńnan alyp tastaımyn, kózińdi qurtamyn» dedi. Bárinen buryn qol qoısań da, qoımasań da, endigi mańyzy qalmaǵan edi. Kóp qujattardy mensiz de rásimdep jibergen. Jer telimderi men jyljymaıtyn múlikti satý, aýdarý tek sonyń quzyrynda boldy»,-dedi ol.
ıAkov Zaıats budan bólek «Gorıachıe ıstochnıkı»,UOS ardagerleri emhanasyn, Syrtqy ister mınıstrligi qabyldaý úıin jáne Gornyı kóshesi, 232 mekenjaıyndaǵy jer telimine qatysty qujattarǵa qol qoıǵany úshin aıyptalǵan.
Eske sala ketsek, erli-zaıypty Hrapýnovtar uıymdasqan toppen birge memleket menshigin urlaý, laýazymdyq ókilettikti asyra paıdalaný, alaıaqtyq, para alý, qylmystyq jolmen alynǵan múlikti zańdastyrý baptary boıynsha aıyptalyp otyr.
