Qol qoıylǵan tarıhı qujat Qazaqstan men Qyrǵyzstannyń ózara baılanysyn damytady - Toqaev
ASTANA. KAZINFORM — Qazaqstan men Qyrǵyzstannyń taýar aınalymy 2 mlrd dollarǵa jetedi. Bul týraly búgin Aqordada Qyrǵyzstan Prezıdenti Sadyr Japarovpen kelissózden keıingi birlesken málimde kezinde Qazaqstan Prezıdenti Qasym-Jomart Toqaev aıtty.
Memleket basshysy Qyrǵyzstan Prezıdentiniń Qazaqstanǵa sapara eki el úshin mańyzy zor ekenin atap ótti.
«Muny kópten kútken is-shara dep aıtýǵa bolady. Qyrǵyzstan biz úshin odaqtas memleket, sondaı-aq tatý kórshi, baýyrlas el ári senimdi seriktes. Halyqtarymyzdyń dostyǵy ortaq tarıhqa jáne rýhanı qundylyqtarǵa nengizdelgen. Biz árdaıym bir-birimizge tilekshi bolyp, jetistikterimizge qýanyp júremiz. Eki eldiń myzǵymas qarym-qatynasy strategııalyq seriktestik rýhynda damyp jatyr. Biz qazir Sadyr Nýrgojoevıch ekeýimiz tarıhı kelisimge qol qoıdyq. Bul - Qazaqstan men Qyrǵyzstan arasyndaǵy odaqtastyq qatynastardy nyǵaıtý jáne keńeıtý týraly shart. Osy qujat ózara baılanystardy odan ári damytýǵa jol ashady, eki eldiń múddesine tolyq saı keledi. ıAǵnı, ǵasyrlar boıy qalyptasqan baýyrlastyq baılanysty saqtaýǵa múmkindik beredi», - dedi Qasym-Jomart Toqaev.
Memleket basshysy eki eldiń dástúrli dostyq jáne tatý kórshilik qatynastaryn nyǵaıtýǵa Qyrǵyzstan basshysy zor úles qosqanyn atap ótti.
«Sol úshin qadirli áriptesime alǵys aıtamyn. Búgin eki el arasyndaǵy Joǵary memleketaralyq keńestiń altynshy otyrysy ótti. Jıynda ekijaqty yntymaqtastyqtyń ózekti máseleleri jóninde jan-jaqty pikir almastyq, naqty ári mańyzdy kelisimderge qol jetkizdik. Baýyrlas eki el arasynda sheshimin tappaǵan túıtkildi másele bolmaýy kerek degen ortaq baılamǵa keldik. Sonymen birge, saýda-ekonomıkalyq baılanystardy nyǵaıtýǵa basa mán berdik. Qazaqstan - Qyrǵyzstannyń saýda jáne ınvestıtsııa salysyndaǵy negizgi seriktesiniń biri. Byltyr ózara taýar aınalymy 1,5 mlrd dollarǵa jetti. Kelissózder barysynda bul kórsetkishti 2 mlrd dollarǵa jetkizýge múddeli ekenimizdi rastadyq. Jalpy, ózara saýda aınalymyn qysqa merzimde edáýir arttyrýǵa múmkindik bar. Biz ónerkásip ónimderin jáne basqa da taýarlardy eksporttaýǵa daıynbyz. Qazaqstan Qyrǵyzstanǵa qazirdiń ózinde 195 taýar túri boıynsha eksport kólemin ulǵaıta alady. Onyń jalpy quny - 260 mln dollar. Qyrǵyz eliniń de Qazaqstanǵa shyǵaratyn ónimderi az emes. Osy oraıda qolda bar múmkindikti barynsha paıdalanamyz dep ýaǵdalastyq. Ásirese, Úkimetaralyq keńes pen Aımaqaralyq forýmnyń jumysyn jandandyrǵan jón», - dedi Qazaqstan Prezıdenti.
Atap aıtqanda Qazaqstan Prezıdenti Qasym-Jomart Toqaev pen Qyrǵyzstan Prezıdenti Sadyr Japarov «Qazaqstan Respýblıkasy men Qyrǵyz Respýblıkasy arasyndaǵy odaqtastyq qatynastardy tereńdetý jáne keńeıtý týraly shartqa» jáne «Qazaqstan Respýblıkasynyń jáne Qyrǵyz Respýblıkasynyń Joǵary memleketaralyq keńesiniń altynshy sheshimine» qol qoıdy.
