Qol-aıaǵy joq qaraǵandylyqty qaıyr suraýǵa májbúrlegen qylmyskerlerge qatysty sot otyrysy bastaldy
QARAǴANDY. KAZINFORM – Qaraǵandyda qol-aıaǵy joq adam men onyń jubaıyn qaıyr suraýǵa májbúrlegen qylmyskerler tobyna qatysty sot otyrysy bastaldy. Olar 10 jyldan astam ýaqyt boıy erli-zaıyptylardy uryp-soǵyp kelgen, dep habarlaıdy Kazinform agenttiginiń tilshisi.
Qol-aıaǵy joq er adam Qaraǵandy qalasynyń 45-shi oramyndaǵy aıaldamanyń janynda qaıyr surap kelgen. 10 jyldan astam ýaqyt boıy ol erkinen tys sadaqa jınaýmen aınalysqan. Eki jyl buryn polıtsııa múgedekti bopsalaǵandardy anyqtady.
Tergeý barysynda tórt qaraǵandylyqtyń zańsyz áreketke barǵany belgili bolyp, olardyń ústinen qylmystyq is qozǵaldy. Bul is qylmystyq ister jónindegi oblystyq mamandandyrylǵan aýdanaralyq sotta qaralady.
Tergeýshilerdiń aıtýynsha, qylmyskerlerdiń bireýi qylmys tobynyń jetekshisi, úsheýi oryndaýshy bolǵan. Top jetekshisi 10 jyl buryn múmkindigi shekteýli er adamdy óz paıdasy úshin qalaı paıdalanýǵa bolatynyn oılap taýyp, múgedek adam men onyń jubaıyn uryp-soǵyp, qorqytqan. Onyń buıryǵy boıynsha erli-zaıyptylar 10 jyldan astam ýaqyt boıy adamdardan qaıyr surap, barlyq tapqanyn qojaıynyna berip otyrǵan.
Tergeýshilerdiń boljamynsha, jábirlenýshiler uıymdasqan qylmystyq top múshelerine kúnine 20 myńnan 40 myń teńgege deıin aqsha bergen. Uryp-soǵýdan basqa múgedek er adamnyń balasyna zaqym keltiremiz dep qorqytqan. Belgili bolǵandaı, 2020 jyly Nıkolaıdyń jubaıy qyz týyp, keıinnen balany tartyp alyp, banda jetekshisiniń qaryndasyna bergen. Nárestemen ata-anasyna tek sırek kezdesýge ruqsat berip otyrǵan.
Bul faktiler atalmysh qylmyskerler esirtkimen ustalyp, top basshysynyń telefonyn tyńdaǵannan keıin anyqtalǵan. Sottalýshylar kinásin moıyndamady.
Jábirlenýshilerdiń múddelerin qoǵamdyq qor qorǵaıdy. Sonymen birge qor ókilderi otbasyna qujattaryn qalpyna keltirýge jáne arnaıy esep ashýǵa kómektesip, zańgerlik kómek kórsetedi.
Eske sala keteıik, buǵan deıin Saranda satýshyny óltirgen qylmyskerge qatysty sot otyrysy bastalǵanyn jazǵan edik.