Qol astyndaǵy qyzmetshilermen ishimdik ishken sheneýnik jumystan qýyldy
Bul týraly Sybaılas jemqorlyqqa qarsy is-qımyl ulttyq bıýrosy Pavlodar oblysy boıynsha departamentiniń basshysy Aıdar Tastemirov oblystyq máslıhattyń keńeıtilgen sessııasy kezinde baıandady.
«Ókinishke oraı, turǵyndar memlekettik qyzmetshiler men túrli deńgeıdegi sheneýnikterdiń etıka normalaryn óreskel buzǵanyna shaǵymdanýda. Jaqynda ǵana ádep jónindegi komıssııa otyrysynda Ýspenka aýdany ákimi orynbasarynyń zańsyz áreketi qarastyrylyp, ol memlekettik qyzmetten bosatyldy. Atalǵan sheneýnik qol astyndaǵy qyzmetshilermen birge spırttik ishimdikter ishken»,- deıdi Aıdar Tastemirov.
Onyń aıtýynsha, Aqqýly aýdanynda taǵy bir sheneýnik qyzmettik kabınetinde azamatty soqqyǵa jyqqan. Artynsha kabınetten shyǵyp, tóbelesti jalǵastyrǵan. Muny memlekettik organ qyzmetkerleri men úshinshi tulǵalar kórgen. Atalmysh is tekserilip jatyr.