Kókjótel, qyzylsha, týberkýlez: Qyzylordada birqatar aýrý kórsetkishi tómendedi

QYZYLORDA. KAZINFORM – Byltyr Qyzylorda oblysynda juqpaly aýrýlar boıynsha epıdemıologııalyq ahýal turaqty boldy.

Oblystyq sanıtarııalyq-epıdemıologııalyq baqylaý departamentiniń málimetinshe, 52 nozologııa boıynsha aýrý tirkelgen joq. 2024 jylmen salystyrǵanda onyń teń jartysyna jýyǵy boıynsha aýrý-syrqaý kórsetkishi tómendegen.

– Bul rette profılaktıkalyq ekpelerdiń mańyzy zor. 15 jyldan beri vaktsına yqpal etetin juqpaly aýrýlardyń, onyń ishinde qurózek, sirespe, gemofıldi ınfektsııa, polıomıelıt, parotıt, pnevmokokk ınfektsııalary tirkelmedi. Egý sharalarynyń nátıjesinde A vırýsty gepatıti boıynsha aýrýshandyq kórsetkishi 2024 jylmen salystyrǵanda 3,2 ese azaıǵan. Kókjótelge shaldyǵý derekteri 37,6 ese, qyzylsha aýrýshańdyǵy 4,6 ese tómendegen. Juqpaly aýrýlarǵa qarsy profılaktıkalyq ekpemen tıisti kontıgenttiń 96,8%-y qamtyldy, - delingen habarlamada. 

Týberkýlez aýrýynyń 355 jańa jaǵdaıy tirkelip, 2024 jylmen salystyrǵanda aýrýshańdyq kórsetkishi 7,1-ge tómendedi. Al brýtsellez dertiniń 19 deregi esepke alyndy.

Buǵan deıin biz elde kókjótelge shaldyqqandar sany byltyrmen salystyrǵanda aıtarlyqtaı tómendegenin jazǵanbyz.