Kókjótel azaıǵanymen, naýqastardyń 91%-y — vaktsına almaǵan bala
ASTANA. KAZINFORM — Qazaqstanda 2026 jyldyń basynan beri kókjótelmen aýyrý byltyrǵy osy kezeńmen salystyrǵanda shamamen 10%-ǵa tómendedi.
Densaýlyq saqtaý mınıstrliginiń habarlaýynsha, jyl basynan beri elde kókjóteldiń 250 jaǵdaıy tirkelgen. Olardyń 91%-y — bes jasqa deıingi vaktsına almaǵan bala.
Mamandardyń aıtýynsha, syrqattanýshylyqtyń tómendeýine balalardy josparly jáne qosymsha vaktsınatsııalaý da áser etip otyr.
2026 jyldyń jeti aıynda kókjótelge qarsy josparly ekpeni 361 myńnan astam bala alǵan. Onyń ishinde bir jasqa deıingi 102 myń, bir jastaǵy 91,5 myń jáne alty jastaǵy 167,5 myń bala bar.
Vaktsına alǵan balalar arasynda ekpeden keıingi qolaısyz reaktsııalar tirkelmegen.
Sonymen qatar belgilengen merzimde túrli sebeppen vaktsına almaǵan balalar men jasóspirimderge qosymsha ımmýndaý júrgizilip jatyr. Jyl basynan beri 18 jasqa deıingi 107,5 myń bala men jasóspirim qosymsha vaktsınatsııalanǵan.
Eske salaıyq, buǵan deıin SQO-da kókjótelmen aýyrý shamamen alty ese tómendegenin jazǵanbyz.
