Kókjıdeniń munaıynan góri sýy mańyzdy – Orazalın
AQTÓBE. QazAqparat – Aqtóbedegi Kókjıde ken ornyndaǵy munaı óndirý jumystaryn toqtatyp, taza aýyz sýdy saqtaý qajet. Másele qazir de ózekti. Bul týraly oblys ákimi BAQ ókilderi qoıǵan suraqqa jaýap berdi, dep habarlaıdy QazAqparat tilshisi.
Aqtóbe oblysy aýmaǵy ornalasqan Kókjıde ken ornyndaǵy sý qory ondaǵan jylǵa jetedi. Alaıda qazir munda aýyz sý emes, munaı óndirilip jatyr.
«Bul - strategııalyq mańyzdy sý qory bar aýmaq. Munaı álde sý ma? Sý mańyzdyraq degen tujyrym jasaldy. Ózimiz álemde ekologııalyq ahýal kúrdelene túskenin kórip otyrmyz. Bizdiń óńir de sonyń bir bólmegi. Byltyrǵy qýańshylyqty esten shyǵarmaý kerek. Sondyqtan Kókjıdedegi sý bizge ǵana emes, bizdiń bolashaq urpaǵymyz úshin de mańyzdy ekenin bilemiz. Ony saqtaý bizdiń basty mindetimiz», - dedi Aqtóbe oblysynyń ákimi Ońdasyn Orazalın.
Onyń aıtýynsha, Shalqar kóli, Aqtóbe qalasyndaǵy aýanyń lastanýy, Káriz-sorǵylaý stansasynyń jumysymen qatar Aqtóbede Kókjıde ken ornynyń máselesi qozǵalyp, tipti Memleket basshysyna jetkizildi. 2020 jyldan bastap QR Ekologııa mınıstrligimen birge zerdeleý jumysy josparlandy.
«Sý qory bar ma? Sý lastanbaǵan ba? Osy eki suraq qaraldy. Byltyr osy jumys tolyq aıaqtaldy. Sý qory jetkilikti. Sý aıtarlyqtaı lastanbaǵan. Biraq Kókjıdeden munaı óndirýdi toqtatý kerek. Onda «QazMunaıGazǵa» tıesili kompanııa, «Ada Oıl» JShS-i, «KMK Munaı» AQ-y bar. Ken ıgerýshilermen aradaǵy kelissózdi Energetıka mınıstrligi júrgizedi. Olarǵa ózge ken orny usynylýy da múmkin. Bizde basqa jol joq. Sý bizge ǵana emes, kórshi oblystarǵa da jetedi», - dedi Ońdasyn Orazalın.
