Kókjaılaýdaǵy saýyq keshi: Kólik ıesi jazalandy
ALMATY. QazAqparat – Almatyda karantınge qaramastan jastar Kókjaılaý shatqalynda kesh uıymdastyrǵan, dep habarlaıdy QazAqparat tilshisi.
Jastardyń kóńildi demalysynan vıdeolar áleýmettik jelide jarııalandy.
QR Ekologııa, geologııa jáne tabıǵı resýrstar mınıstrliginiń baspasóz qyzmetinen málim etkendeı, bul shara 24 mamyr kúni bolǵan.
«Karantın rejıminiń alynbaǵanyna baılanysty Almatyda 8 ekologııalyq post arqyly Іle Alataýy ulttyq parki terrıtorııasyna ótýge tyıym salynǵan. Alaıda, Ulttyq park aýmaǵy úlken bolǵandyqtan, adamdar Prosveşenets, Gorelnık, Aqqaıyń, Kimasar asýlary arqyly da keledi. Bul joldardy ulttyq park qyzmetkerleri baqylaı almaıdy», - dedi mınıstrliktiń baspasóz qyzmetinen.
Odan bólek, Kókjaılaý terrıtorııasyna Kazachka shatqaly arqyly da ótýge bolady. Bul jerde Kazachka, Alma-Arasan, Kókshoqy aýyldary, 5 myń adam turatyn Arasan saıajaıy ornalasqan.
Sondaı-aq atap ótilgendeı, vıdeoǵa túsip qalǵan 888 SAB 02 nómirli kóliktiń júrgizýshisine ákimshilik aıyppul salyndy.
«Іle Alataýy ulttyq parkiniń ınspektorlary júrgizýshini QR ÁqbK 367-babynyń 3-bóligine sáıkes ákimshilik jazaǵa tartyp, 100 AEK mólsherinde aıyppul saldy», - dedi vedomstvodan.
QR Ekologııa, geologııa jáne tabıǵı resýrstar mınıstrligi karantın rejımin saqtaýǵa jáne osyǵan uqsas quqyqbuzýshylyq derekter anyqtalǵan jaǵdaıda 297 07 72 nómirine habarlaýdy suraıdy.
