Kókjaılaýdaǵy qurylys: shatqalǵa shyǵýǵa tyıym salynýy múmkin be
ALMATY. KAZINFORM — Kókjaılaý shatqalynda 2 aıǵa jýyq ýaqyt buryn Almaty SuperSki jobasy boıynsha qurylys jumystary bastaldy.
Qala turǵyndary men ekobelsendiler arasynda Almaty taýlaryndaǵy tumsa tabıǵattyń bolashaǵy úshin ýaıym áli seıilmeı keledi.
Áleýmettik jelide Kókjaılaýǵa qatysty ártúrli pikirler kóp. Onyń biri — kýrort taýdaǵy muzdyqtardyń erýine áser etedi dese, ekinshisi — aǵashtardy kesý shatqaldaǵy ekojúıeni buzatyny aıtylǵan. Sýretshi Pasha Kastyń Kókjaılaýǵa arnap salynǵan týyndysy da kópshiliktiń arasynda úndeý tapty.
Biraq Almaty SuperSki jobasynyń jetekshisi — Kazakh Tourism Development Ltd. ókilderi tabıǵattyń qaýipsizdigi úshin alańdaýǵa negiz joq ekenin aıtady. Kazinform agenttigine bergen jaýabynda kompanııa josparlanǵan jumystar jobalyq qujattamaǵa jáne qoldanystaǵy zańnama talaptaryna sáıkes kezeń-kezeńmen júzege asyrylatynyn atap ótti.
— Almaty SuperSki jobasy qazirgi ýaqytta belsendi iske asyrý kezeńinde. Qurylys alańynda tehnologııalyq jáne kirme joldardyń qurylysy júrip jatyr. Sonymen qatar jobany odan ári damytý úshin qajetti keńeıtilgen ınjenerlik-geologııalyq jáne arheologııalyq zertteýler júrgizilip jatyr, — delingen kompanııa jaýabynda.
Kazakh Tourism Development Ltd. málimetine sáıkes, jobaǵa otandyq jáne halyqaralyq beıindi uıymdar tartylǵan. Aspaly joldardy salý jumystaryn frantsýzdyq POMA kompanııasy júzege asyrady. Al avtorlyq qadaǵalaýdy «Qazaq qurylys jáne sáýlet ǵylymı-zertteý ınstıtýty» AQ qamtamasyz etedi. Táýelsiz baqylaýǵa halyqaralyq konsýltanttar — PGI, Hill International jáne DCSA jaýapty.
Al jobany qarjylandyrý «Qazaqstan Investment Corporation» AQ-nyń qarajaty esebinen júrgizilip jatyr
— Kýrortty iske qosý 2028 jyldyń sońyna josparlanǵan, — dep habarlady kompanııadan.
Al Іle-Alataý memlekettik ulttyq tabıǵı parkiniń dırektory Elnur Ahmetov agenttik saýalyna bergen jaýabynda qurylys jumystaryn júrgizý — Kókjaılaýǵa qoljetimdilikti shektemeıtinin aıtty. Onyń sózinshe, qaýipsizdikti qamtamasyz etý maqsatynda tikeleı qurylys jumystary júrgizilip jatqan nemese arnaıy tehnıkanyń qozǵalysy júzege asyrylatyn jekelegen ýchaskelerge ǵana kirý ýaqytsha shektelýi múmkin.
— Mundaı shekteýler kezeńinde qurylys aımaqtaryn aınalyp ótýge múmkindik beretin balama marshrýttar qarastyrylady, — dedi Elnur Ahmetov.
Sonymen qatar ol kýrort qurylysy júrgiziletin aýmaqtyń ózinde Іle-Alataýy MUTP mamandary «Qazgıproleshoz-KZ» JShS-men birlesip egjeı-tegjeıli orman-patologııalyq zertteý júrgizgenin atap ótti. Aıtýynsha, zertteý nátıjesinde kýrort qurylysy júrgiziletin aýmaqta Qazaqstan Respýblıkasynyń Qyzyl kitabyna engizilgen aǵashtardyń anyqtalmaǵan.
— Jobany iske asyrý barysynda jasyl jelekterdi saqtaýǵa jáne olardy qaıta otyrǵyzýǵa basymdyq beriledi. Jobaǵa sáıkes, Kókjaılaýda jol salý jumystary boıynsha Memlekettik orman qory ýchaskelerinde kesiletin aǵashtar belgilenip, olardyń kólemi men sapalyq kórsetkishteri anyqtaldy. № 27-03/165-NQ 25.06.2026 Orman sharýashylyǵy jáne Janýarlar dúnıesi komıtetinen aǵashtardy kesýge ruqsat alyndy, — dep naqtylady ulttyq park basshysy.
Eske salaıyq, Kókjaılaýdan bólek Almatynyń ózge shatqaldarynda taý klasterin damytý jobasy boıynsha qurylys jumystary bastalǵany belgili boldy.
