Kókjaılaý shatqalynyń 10 gektar jeri Іle-Alataýy tabıǵı parkine qaıtarylady
ALMATY. QazAqparat - Almatyda Kókjaılaý shatqalynyń 10 ga jeri Іle-Alataýy tabıǵı parkine qaıtarylatyn boldy, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.
Qala ákimi Baýyrjan Baıbek Kókjaılaý kýrortyn damytý týraly kóshpeli jıyn barysynda kýrorttyń 100 ga jerin Іle-Alataý parkine qaıtarýdy tapsyrdy.
«Almaty Mountain Resorts» JShS basshysy Naıl Nurov aıtqandaı, búginde taý shańǵysy kýrortynyń aýmaǵy alǵashqy nusqasynan eki ese ońtaılandyrylǵan.
«Qurylys alańy 300 myń sharshy metrden 30 myń sharshy metrge deıin, ıaǵnı 10 ese qysqardy. Shańǵy trassasy 77-den 18-ge deıin azaıdy. Qonaq úılerdiń syıymdylyǵy 6,5 myń orynnan 250-ge azaıdy. Jasandy qar tóseýge arnalǵan eki kóldiń bireýi ǵana qaldy. Osyǵan baılanysty 1002 ga jerden 100 ga aýmaqty bosattyq. Bolashaqta bosatylatyn jer kólemi odan da kóp bolýy múmkin», - dedi Naıl Nurov.
Qala basshysy Kójaılaý jerin Іle Alataýy parkine qaıtarý máselesin shuǵyl arada qaraýdy tapsyrdy.
Aıta ketý kerek, Kókjaılaý kýrorty boıynsha tehnıkalyq-ekonomıkalyq negizdeme bıyl aıaqtalady. Sodan soń atalǵan joba qoǵamdyq talqylaýǵa salynady.
