Kókjaılaý shatqalynda zardap shekken jigit qutqaryldy
ALMATY. QazAqparat - Almatynyń «109» qutqarý qyzmeti taýǵa serýenge baryp, aıaǵyn syndyryp alǵan jigitti tómenge evakýatsııalady, dep habarlaıdy QazAqparat.
Qutqarý qyzmetine 14 sáýirde saǵat 12:30-da Almaty qalalyq TJD kezekshisinen habar kelip túsken.
Olardyń málimetinshe, taýǵa serýenge barǵan jigit aıaǵyn syndyryp alǵan. Ol ózdiginen júre almaıtyndyqtan, sol jerge arnaıy qural-jabdyǵy bar qutqarýshylar ekıpajy attandyryldy.
«Qutqarýshylar zardap shegýshige baılanysqa shyqty. 19 jastaǵy jigit týrıster quramynda bolǵan kezde qulap, aıaǵynan jaraqat alǵan. Sodan keıin júre almaǵan», - delingen habarlamada.
Jigitke qutqarýshy dáriger medıtsınalyq kómek kórsetti, aıaǵy men jambas urshyǵyna ımmobılızatsııa jasady.
Qutqarýshylar zardap shekken jigitti taýdan arnaıy jabdyqpen etektegi jedel járdem brıgadasyna deıin jetkizdi. Dárigerler jigitti qarap shyqqan soń qaladaǵy aýrýhanaǵa alyp ketti.
Operatsııaǵa qutqarý qyzmetiniń 1 tehnıkasy men 4 qutqarýshy mamany jumyldyryldy.
Avtor: Elaman Turysbekov
