«Kókjaılaý» shatqaly Іle Alataýy ulttyq parkine qaıtaryldy
«QR Úkimetiniń qaýlysymen Almaty qalasy Medeý aýdanyndaǵy 1002,0 gektar aýmaqty quraıtyn Kókjaılaý shatqaly Іle-Alataý memlekettik ulttyq tabıǵı parkiniń quramyna qaıtaryldy»,- dep habarlady QR EGTRM Orman sharýashylyǵy jáne janýarlar dúnıesi komıtetiniń baspasóz qyzmeti
Kókjaılaýdyń basym bóligin qylqan japyraqty shyrsha ormandarynyń biregeı ekojúıeleri men landshafttar alyp jatyr. Kókjaılaý landshafttarynyń estetıkalyq qundylyǵy, ásirese Qumbel jotasynyń tómengi bóliginde jaqsy saqtalǵan.
Kókjaılaýdyń qoınaýynda QR Qyzyl kitabyna engen Shrenk shyrshasynyń jataǵan pishini (stlannıkovaıa forma) Sıvers almasy, Alataý órigi, ortasha pıon, Vıttrok raýǵashy, Ostrovskıı qyzǵaldaǵy, Alataý báıleshegi, syndy t.b ósimdikter ósedi.
Sondaı-aq bul meken janýarlar álemine de baı. Sútqorektilerdiń 57 túri, qustardyń 200 túri, baýyrymen jorǵalaýshylardyń 4, qosmekendilerdiń 3 jáne balyqtardyń 4 túri kezdesedi.
Kókjaılaýdyń tumsa tabıǵaty týrızm úshin de qolaıly. Máselen kelýshiler Medeý jaǵynan da, Almaarasan shatqaly jaǵynan da ońaı kóterilip, tabıǵı landshafty qyzyqtaı alady.
Eske salsaq, 2014 jyly Úkimettiń qaýlysymen jalpy aýmaǵy 1002 gektar Іle Alataýy memlekettik ulttyq tabıǵı parkiniń jeri aıryqsha qorǵalatyn tabıǵı aýmaq sanatynan Almaty qalasynyń Medeý aýdanynyń qory sanatyna «Kókjaılaý» taý shańǵysy kýrortynyń qurylysy men jumys isteýi úshin berilgen bolatyn.
2019 jylǵy qazanda Qazaqstan Respýblıkasynyń Prezıdenti Qasym-Jomart Toqaev jurtshylyqtyń pikirin eskere kelip, «Kókjaılaý» shatqalynda taý shańǵysy kýrortyn salý jobasyna tyıym salǵan edi.
2021 jyldyń qazan aıynda Kókjaılaý shatqalynda ornalasqan 1002,0 gektar jer ýchaskesin, Іle-Alataý memlekettik ulttyq parkine qaıtarý máselesin qarastyrý jónindegi komıssııa quryldy.
«Komıssııa músheleri memlekettik ekologııalyq saraptamanyń qorytyndysyna sáıkes erekshe qorǵalatyn tabıǵı aýmaqtar sanatyna qaıtarýdy zańdy dep sanady. Kókjaılaý shatqalynyń tabıǵı baılyǵyn saqtap qalý bizdiń ortaq mindetimiz»,- dep qosty vedomstvadan.
