«Kókjaılaý» kýrortyna bólingen jer ulttyq park quramyna qaıtarylýy múmkin

NUR-SULTAN. QazAqparat – «Kókjaılaý» taý shańǵysy kýrortyna bólingen jer telimderi Іle Alataýy ulttyq parkiniń quramyna qaıtarylýy múmkin. Bul týraly QR Premer-Mınıstri Asqar Mamınniń Májilis depýtattarynyń resmı saýalyna bergen jaýabynda aıtylǵan, dep habarlaıdy QazAqparat tilshisi.

«Kókjaılaý» taý shańǵysy kýrorty qurylysynyń jobasyn júzege asyrý aıasynda Almaty qalasynyń ákimdigi onyń qurlysy úshin berilgen aýmaqty qysqartý máselesin qarastyryp jatyr. Buǵan qosa, Qazaqstan Respýblıkasy Prezıdentiniń 2019 jylǵy 8 sáýirdegi tapsyrmasyna sáıkes, jobany júzege asyrý ýaqytsha toqtatylǵan. Jobany júzege asyrýdan bas tartylǵan jaǵdaıda Ekologııa, geologııa jáne tabıǵı resýrstar mınıstrligi «Kókjaılaý» taý shańǵysy kýrorty qurylysy úshin buǵan deıin berilgen jer qoryn ulttyq parktiń quramyna qaıtarýdy kózdeıtin QR Úkimeti qaýlysynyń jobasyna bastamashylyq jasaıdy», - delingen Úkimet basshysynyń jaýabynda.

Esterińizge sala ketsek, 2019 jyldyń 3 sáýirinde Іle Alataýy ulttyq parki aýmaǵyndaǵy 5 jer ýchaskesi jalǵa berý úshin tenderge qoıylǵany belgili boldy. Bul jobaǵa qoǵam tarapynan narazylyq týyndaǵannan keıin Almaty ákimi Baýyrjan Baıbek «Kókjaılaý» kýrortynyń qurylysy keıinge qaldyrylǵanyn málimdedi.