Kókjaldy qolmen alý: ShQO turǵyndary qasqyrmen kúreste qaýqarsyz
ÓSKEMEN. QazAqparat - Qoraǵa túsken kókjaldy qaqpanmen ustap, soıylmen soǵyp alǵan tarbaǵataılyq jigit týraly vıdeo áleýmettik jelide tarap ketti. Atalǵan oqıǵanyń mán-jaıyn QazAqparat tilshisi Jańaaýyl aýyldyq okrýgine habarlasyp bildi.
Aýyldyq korýgtiń ákimi Dáýitbek Nııazbekov qaqpanmen qasqyr aýlap júrgen jigittiń Tarbaǵataı aýdany Ahmetbulaqta turatynyn aıtty. Oqıǵa Ahmetbulaqtyń syrtyndaǵy qystaýda bolǵan. Qasqyr týraly vıdeony telefonǵa túsirgen jigittiń aty-jóni Maqsat Baıbazarov. Ákesi Dálelbek Baıbazarovpen birge atalǵan qystaýda mal baǵady.
«Maqsattyń ózi vıdeoda aıtqandaı, qystaýǵa kelgeli qorasynan alty qoı men bir taıdy ıtqus jep ketken. «Mal ashýy - jan ashýy» degendeı, qaqpandaǵy qasqyrdy sol úshin soǵyp alǵan», - deıdi ákim.
Ákimniń aıtýynsha bul aımaq Qytaımen shekarada jatqandyqtan, aýyl turǵyndaryna myltyqpen uzaq shyǵýǵa tyıym salynǵan. Itqustyń qystaýlarǵa jıi shabýyldap, malǵa aýyz salýynyń bir sebebi osynda jatsa kerek.
«Ahmetbulaq aýly shekaraǵa jaqyn ornalasqandyqtan, qystaýlarǵa ruqsat arqyly ǵana shyǵamyz. Ol jaqqa myltyqpen ótkizbeıdi. Qystaýda bir-birinen alshaq ornalasqan 40-qa jýyq qora bar. Qora ıeleriniń eshqaısynda myltyq joq. Bir sózben aıtqanda, qystaýdaǵy maldan buryn malshyǵa qaýip tónýi múmkin. Toptasyp kelse, qarýsyz adamdy da jaralaıdy ǵoı, - deıdi Dáýitbek Nııazbekov.
Kókjaldy qolmen soǵyp alǵan jigitpen habarlasýdyń sáti túspedi. Okrýg ákimi onyń qystaýynda uıaly baılanys joq ekenin aıtty.
Aıta keteıik, buǵan deıin óńirdiń birneshe aýdanynda qasqyr shabýyly jıilegenin jazǵan bolatynbyz.
