«Kókjaldar mekeni» serıaly Túrkııadaǵy FETO tergeýiniń nazaryna ilikti
ASTANA. KAZINFORM — Túrkııanyń ýákiletti organdary tanymal túrik serıalyn teksermek. Buǵan serıalda FETO-ny nasıhattaýy múmkin degen kúdiktiń bolýy sebep bolǵan. Sonymen qatar keıipkerlerdiń biriniń burynǵy barlaý qyzmetkerimen baılanysy bolýy múmkin degen boljam da anyqtalady, dep habarlaıdy Kazinform agenttiginiń Ankaradaǵy menshikti tilshisi.
Ystanbuldyń Sılıvrı aýdanynyń prokýratýrasy Túrkııanyń Ulttyq barlaý uıymynyń burynǵy qyzmetkeri Kashıf Kozynoglýnyń ólimine qatysty tergeý barysynda «Kókjaldar mekeni» (túrikshe: «Kurtlar Vadisi») serıalyn teksere bastady.
Kozynoglý «Ergenekon» jáne «OdaTV» isteri aıasynda qamaýǵa alynyp, 2011 jyly Sılıvrı túrmesinde qaıtys bolǵan. Endi prokýratýra tergeý barysynda paıda bolǵan málimetterge nazar aýdaryp, serıaldyń jekelegen epızodtarynda Fethýllah Gúlen uıymy (FETO) nasıhattalýy múmkin degen boljamnyń negizdiligin anyqtamaq.
Tergeý barysynda shynaıy ómirdegi Kashıf Kozynoglýǵa uqsastyǵy bar Qazym Kashıfoglý keıipkeriniń serıalda qalaı beınelengenine erekshe nazar aýdarylady. Prokýratýra onyń oqıǵa jelisindegi rólin, keıipkerdiń qaza tabý jaǵdaıyn jáne jekelegen kórinisterde qoldanylǵan vızýaldy belgilerdi zerttemek.
Atap aıtqanda, memlekettik nómirinde «FG» áripteri bar kólikterdiń serıaldaǵy kórinisteri tekseriledi. Tergeý bul belginiń Fethýllah Gúlenmen baılanysty jasyryn sımvol retinde qoldanylǵan bolýy múmkin degen boljamdy qarastyryp jatyr.
Taldaý júrgizý úshin arnaıy sarapshylar toby quryldy. Olar serıaldyń tıisti epızodtaryndaǵy stsenarıı men dıalogtardy, keıipkerlerdiń beınesin, kórinisterde qoldanylǵan túrli belgilerdi jáne jasyryn maǵyna berýi múmkin tustardy zertteıdi. Zertteý qorytyndysynda sarapshylar serıaldaǵy materıaldardyń FETO-ny nasıhattaý belgilerine saı keletin-kelmeıtinin jáne týyndynyń atalǵan tyıym salynǵan uıymmen qandaı da bir baılanysy bolǵan-bolmaǵanyn anyqtaýǵa tıis.
Tekseris Kozynoglýnyń ólimine qatysty áli de jalǵasyp jatqan tergeý aıasynda júrgizilip jatyr. Onyń nátıjeleri tıisti qylmystyq istiń materıaldaryna engiziledi. Bul rette serıalǵa qatysty aıtylǵan kúdik ázirge zańdy kúshine engen sot sheshimimen rastalmaǵan. Sondyqtan bul máselege qatysty barlyq boljam men tujyrym qazirgi ýaqytta tergeý aıasynda qarastyrylyp jatyr.
Buǵan deıin dombyra úni Netflix-ten bastap tarıhı serıaldarǵa deıin álemdik ekrandarda shyrqalǵany habarlanǵan bolatyn.
Aqzat Jıenalına
