Qoqys jáshiginen sábıdi qutqarǵan áıel: Ol kıimsiz, jaıalyǵy ashylyp jatty
ASTANA. QazAqparat - Pavlodarlyq 53 jastaǵy áıel balany dárihanaǵa bara jatqan jolda qoqys konteınerinen baıqap qalǵan, dep habarlaıdy pavlodarnews.
Bala kıimsiz bolǵan. Jaıalyǵy ashylyp, qoldary kógere bastaǵan. Bul jóninde náresteni qutqarýshy Nazıra Omarova aıtyp berdi.
«Keshki saǵat 19:30 kezinde dárihanaǵa bara jatqanda, joldy tótesimen kesip, Gagarın kóshesi, 40-úıdiń qoqys konteınerleriniń janymen ótpek boldym. Ekinshi konteınerden balanyń jylaǵanyna uqsas daýys shyqqanyn estidim. Alǵashynda senbedim. Mysyqtar shyǵar dep oıladym da, qaıta keldim. Qarasam, ortasyna deıin qoqysqa tolǵan, ústinde bala jatyr. Aınalada eshkim bolmady. Bir kólik ótip bara jatty. Bizdi emhanaǵa tezirek aparar dep qol bulǵadym, toqtamaı ketti, - deıdi Nazıra Omarova.
Nazıra Omarovanyń aıtýynsha, bala jaıalyqqa shala oralǵan, juqa bas kıimdi, ústine juqalaý kórpeshik jabylǵan kúıde bolǵan.
«Men ony qolyma alyp, qushaqtap, sóılese bastap edim jylaýyn toqtatty. Júgirgen boıy qyzymnyń úıine bardym. Ol jaqyn aradaǵy Pahomov kóshesinde turady. Jolda telefon shalyp, jedel járdem men polıtsııa qyzmetkerlerin shaqyrttym», -deıdi qutqarýshy.
Úıge kelgen soń qutqarýshy ony jyly kórpege oraǵan. Sábı jylynyp, tynyshtalǵan.
«Ózimde úsh nemerem bar. Eger men estimeı qalǵan bolsam, qarańǵyda eshkim kórmeýshi edi, men jaqyn mańda bolmasam ústine qoqys tastalyp, ólip ketýi múmkin edi. Qazir meniń qanatym ósken sııaqty. Sábıdi qutqaryp qalǵanyma sheksiz qýanyshtymyn. Oǵan baqytty ǵumyr tileımin, - deıdi N.Omarova.
Nazıra Omarova Pavlodar oblysy boıynsha sot saraptamalary ınstıtýtynyń bıologııalyq bóliminde tazalaýshy bolyp jumys isteıdi.
Buǵan deıin habarlaǵanymyzdaı, Pavlodar qalasyndaǵy qoqys jáshiginen jańa týǵan náreste tabylǵan edi.
Sondaı-aq, oblystyń bas dárigeri Oraz Muqashev qoqys konteınerinen tabylǵan sábıdiń densaýlyǵy týraly QazAqparat tilshisine aıtyp bergen bolatyn.
