Qoqys polıgonyndaǵy órt órship barady - ShQO
ÓSKEMEN. QazAqparat – Óskemen qalasynda órt sóndirýshiler qoqys polıgonyndaǵy órtpen kesheden beri arpalysýda, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, órt sóndirýshiler men jergilikti atqarýshy organdardyń ókilderi qoqys polıgonyndaǵy órtti sóndire almaı jatyr.
«Órt 26 sáýirde saǵat 12.00 shamasynda bastalǵan. Qazirgi ýaqytta tilsiz jaýdyń jalpy aýmaǵy 800 sharshy metrge deıin jetken. Qutqarýshylar arnaıy tehnıkalarmen sol jerde táýlik boıy jumys isteýde. Oqıǵa ornyna barlyǵy 30 adam men 9 tehnıka jumyldyrylǵan», - dep habarlady vedomstvo ókilderi.
Tóbe bop úıilgen qoqys pen jel jańadan órt oshaqtaryn týdyryp, sóndirýdi qıyndatýda. Aldyn ala málimet boıynsha jalynnyń shyǵýyna – qasaqana órt qoıý nemese otty abaısyz paıdalaný sebep bolýy múmkin.
