Qoqys polıgonynan tabylǵan adam músheleri: Kýágerlerge úkim shyqty
ÓSKEMEN. QazAqparat - Óskemende páterinde kisi ólimi bolǵanyn jasyryp qalǵan áıelge qatysty sot úkimi shyqty, dep habarlaıdy QazAqparat tilshisi.
Oqıǵa byltyr qarasha aıynda Bajov kóshesiniń boıyndaǵy úılerdiń birinde bolǵan. Tanys áıeldiń páterinde ishimdikke bas qoıǵan 2 azamattyń arasynda kıkiljiń týyp, sońy qandy oqıǵamen aıaqtalady. Kúdikti shólmektesin qolyna túsken pyshaqpen birneshe ret jaraqattap, ólgen soń aıaq-qolyn múshelep, qoqys jáshigine tastaıdy. Bólshektelgen adam denesin qoqys polıgonyndaǵylar baıqaǵan. Qaza bolǵan adamnyń kim ekenin anyqtaý polıtsııa qyzmetkerlerine qıynǵa soqpapty.
«Kóp ótpeı kúdikti de qolǵa tústi. Al osynyń bárin bile tura, ún-túnsiz qalǵan 51 jastaǵy kelinshek (páter ıesi) tıisti jazasyn aldy. Sot ony 4 jylǵa bas bostandyǵynan aıyrdy» - delingen Óskemen qalasynyń №2 soty taratqan málimette.
Al moınyna adam qanyn júktegen kúdiktiniń isi ShQO mamandandyrylǵan aýdanaralyq qylmystyq sotynda áli de qaralýda.
